Այսօր Արգենտինայի հետ պատերազմի 30-ամյակի կապակցությամբ, որն սկսվել էր Ատլանտյան օվկիանոսի հարավում տեղակայված արշիպելագի պատճառով, Ֆոլկլենդյան կղզիների վրա ինքնիշխանություն հաստատելու վճռականություն է հայտնել Մեծ Բրիտանիայի վարչապետ Դեվիդ Քեմերոնը:
Ինչպես տեղեկացնում է ITAR-TASS-ը, որպես հաշտվողական ժեստ` վարչապետը կոչ է արել հարգել այդ պատերազմում ընկած ինչպես արգենտիական, այնպես էլ բրիտանական կողմի զինվորների հիշատակը:
«30 տարի առաջ Ֆոլկլենդյան կղզիների ժողովուրդը դարձավ ագրեսիայի զոհ, որը սպառնում էր նրա ազատությանն ու սովորական կենսակերպին: Այսօր մենք պետք է խորհենք և ոգեկոչենք նրանց հիշատակը, որոնց կյանքը խլել է պատերազմը»: Այս մասին ասել է Դեյվիդ Քեմերոնը Ֆոլկլենդյան կղզիներում արգենտիկական դեսանտի իջեցման 30-ամյակի կապակցությամբ:
«Մենք իրավամբ հպարտանում ենք այն դերով, որը Բրիտանիան խաղացել է արդար գործի համար պայքարում»,-նշել է Մեծ Բրիտանիայի վարչապետը` ընդգծելով, որ Միացյալ Թագավորությունը մնում է իր խիստ դիրքորշմանը` պաշտպանել Ֆոլկլենդյան կղզիների բնակիչների շահերը, որոնց մեծամասնությունը հանդիսանում է Մեծ Բրիտանիայի վերաբնակների սերունդը: «Այդ իրավունքը պատկանում է նրանց ու միայն նրանց»,- ընդգծել է Քեմերոնը:
Նշենք, որ Արգենտինան Մեծ Բրիտանիայի հետ վիճում է Ֆոլկլենդյան կղզիների համար, որ գտնվում են ատլանտյան և խաղաղօվկիանոսյան ծովային ուղիների ռազմավարական կարևորագույն խաչմերուկում: Արգենտինայում Ֆոլկլենդյան կղզիներն անվանում են Մալվինյան կղզիներ:
1982 թվականին արգենտինական դեսանտ էր իջեցվել Ֆոլկլենդյան կղզիներ` ստիպելով բրիտանական փոքր կայազորին հանձնվել: Արգենտինան իր գործողությունները բացատրել էր պատմական արդարությունը վերականգնելու հանգամանքով. 19-րդ դարի սկզբին կղզիները պատկանել են Արգենտինային: Սակայն Միացյալ Թագավորությունը արշիպելագը վերադարձնելու համար այնտեղ էր ուղարկել մեծ ռազմածովային ստորաբաժանում:
Արգենտինան պարտություն էր կրել, բայց չէր հրաժարվել Մեծ Բրիտանիայի նկատմամբ ունեցած իր պահանջներից: Նշենք, որ Ֆոլկլենդյան կղզիների բնակչությունը կազմում է 3000 մարդ:
