Ազգային վիճակագրական ծառայությունը ՏՀՏ ոլորտի աճը պաշտոնապես հրապարակել է 1.4%, սակայն ոլորտի ներկայացուցիչները պնդում են, որ աճը շատ ավելի մեծ է: «Առաջին լրատվական»-ի հետ զրույցում Ձեռնարկությունների ինկուբատոր հիմնադրամի տնօրեն Բագրատ Ենգիբարյանը պարզաբանեց, որ դա ձեռնարկությունների հաշվարկի խնդիր է, որ չի լուծվում. ԱՎԾ-ն չի դիտարկում ՏՀՏ բոլոր կազմակերպությունները, այլ միայն 30-ի ցանկը:
«Պետք է ամբողջ ՏՀՏ-ն առանձնացնել որպես տնտեսության համար առանձին ոլորտ: Խնդիրն այն է, թե ով պետք է հաշվառումն իրականացնի`էկոնոմիկայի նախարարությո՞ւնը, թե՞ վիճծառայությունը: Օրենքի խնդիր է, որ վիճակագրության հաշվառումը դրված է ԱՎԾ վրա, մինչդեռ աշխարհում դա դրված է ճյուղային նախարարությունների վրա, որոնք տվյալները փոխանցում են վիճվարչությանը: Իրականում բարդ հարց չի, բայց խնդիր է ստեղծում արդեն մի քանի տարի»,- ասաց Բ. Ենգիբարյանը:
ՁԻՀ-ը արդեն մի քանի տարի իրականացնում է ոլորտի ռեգիստրը: Բ. Ենգիբարյանը ներկայացրեց 2011-ի իրենց տվյալները. աճը՝ 22.6%, կազմակերպությունների քանակը՝ 281, հասույթը՝ 205 մլն դոլար, աշխատուժը՝ 6760 մարդ (միայն մասնագետները), իսկ ընդհանուր աշխատակիցների թիվը գերազանցում է 11 հազարը, արտադրանքի 60%-ն արտահանվել է, կազմակերպություններից 107-ը արտասահմանյան են, իսկ 174-ը՝ տեղական:
