Դատավորին պատասխանատվության ենթարկելն օրենքի գերակայությանը չի նպաստի: Այսօր «Առաջին լրատվական»-ի հետ զրույցում նման տեսակետ հայտնեց փաստաբան Հովիկ Արսենյանը` անդրադառնալով երեք դատավորներին պատասխանատվության ենթարկելու արդարադատության խորհրդի որոշմանը:
Նա ընդգծեց, որ երեք դատավորի պատասխանատվության ենթարկելը չի կարող արդարադատության համակարգի առողջացմանը նպաստել, քանի որ պատասխանատվության ենթարկում են դատավորների կոպիտ սխալների համար, որը, նրա համոզմամբ, չի կարող բերել նրան, որ օրենքի գերակայություն, օրինականություն հաստատվի և դատական իշխանությունն ավելի արդար գործի: «Դատավորը չպետք է նման կոպիտ խախտում թույլ տա, որ նրա նկատմամբ վարույթ իրականացվի»,- նկատեց փաստաբանը:
Հիշեցնենք, որ ՀՀ արդարադատության խորհուրդը որոշել է կարգապահական պատասխանատվության ենթարկել ՀՀ վերաքննիչ քրեական դատարանի դատավորներ Մանուշակ Պետրոսյանին, Մհեր Արղամանյանին և Գրիշա Մելիք-Սարգսյանին: Խոսքը վերաբերում է համաներմամբ ազատ արձակվելու ենթակա մի դատապարտյալի դեմ կայացված դատական ակտին, որի վերաբերյալ ՀՀ վճռաբեկ դատարանի նախագահի կողմից Կարգապահական հանձնաժողովին հասցեագրված գրությունն էլ ակտը կայացրած դատավորների նկատմամբ կարգապահական վարույթ հարուցելու առիթ է դարձել:
