Գերմանիայի ամենամեծ ֆինանսական կազմակերպությունը՝ Deutsche Bank-ը, ակտիվների ծավալով ճանաչվել է 2011թ. Եվրոպայի ամենախոշոր բանկը՝ շրջանցելով ֆրանսիական BNP Paribas-ին:
Ինչպես հաղորդում է Bloomberg-ը, անցյալ տարվա ընթացքում Deutsche Bank-ի ակտիվներն աճել են 14%-ով՝ հասնելով 2.16 տրլն դոլարի: Մյուս եվրոպական բանկերը եվրոգոտու պարտքային ճգնաժամի պայմաններում ստիպված են եղել հրաժարվել ակտիվներից: Գործակալությունը նշում է, որ Deutsche Bank-ի ակտիվների ծավալն ավելացրել է անգամ 2008թ. տնտեսական սուր ճգնաժամի պայմաններում: Ընդհանուր առմամբ 2009-ից հետո բանկի ակտիվներն ավելացել են 44%-ով:
BNP Paribas-ը, որը 2010թ. առաջատարն էր եվրոպական բանկերի շրջանում, 2011թ. ակտիվների ծավալը նվազեցրել է 1.7%-ով՝ հասցնելով մինչև 1.97 տրլն եվրոյի, ինչը նվազագույն ցուցանիշ ն է 2007թ. հետո: Այդպիսով նա զբաղեցրել է երրորդ հորիզոնականը՝ իրենից առաջ թողնելով բրիտանական HSBC-ն, որը ցուցաբերել է ակտիվների 4 տոկոսանոց աճ:
Համեմատության համար նշենք, որ ԱՄՆ խոշորագույն JPMorgan Chase & Co. բանկը 2011թ. իր ակտիվներն ավելացրել է 7%-ով՝ հասցնելով մինչև 2.27 տրլն դոլարի (1.7 տրլն եվրո): Bank of America-ի ակտիվներն անցյալ տարի նվազել են 6%-ով՝ հասնելով 2.3 տրլն դոլարի:
