«Կապանի Շահումյանի հանքավայրի շահագործման բաց նախագիծը մարդկանց դեմ բացահայտ ցեղասպանություն է». Կապանի հանքավայրի շահագործմանն այս որակավորումն են տալիս ՀՀ բնապահպանական կազմակերպությունները: Խոսքը «Deno Gold Mining» ընկերության նախագծի մասին է, որի համաձայն` Շահումյանի ոսկու բազմամետաղային հանքավայրը շահագործվելու է բաց եղանակով: «Մենք կորցնում ենք Զանգեզուրը: Այսօր այնտեղ այնպիսի իրավիճակ է ստեղծվել, որ և Ղափանում, և Քաջարանի շրջակայքում բոլոր գյուղերը վտանգված են»,-Առաջին լրատվականին այս մասին հայտնեց Էկոլոգիական հասարակական դաշինքի համակարգող Սիլվա Ադամյանը: Այդպիսով պայթեցումների, փոշու և տոքսիկ տարրեր պարունակող միլիոնավոր տոննա ապարների ազդեցության տակ կհայտնվի Կապան քաղաքի տարածքը, որը մասնակիորեն տեղակայված է հանքավայրի վրա: Տեղի մասնագետներն ահազանգում են, որ սարսափելի հատևանքների կբերի շահագործվող հանքի մոտեցումը բնակեցված շրջաններին: «Այսպես ուղղակի շարունակվել չի կարող մենք փորձելու ենք դիմել կառվարությանը, նույնիսկ Deno gold mining-ի գլխամասային գրասենյակին` Կանադա:Մի քանի անգամ նամակ է գրվել նախագահին, բայց մինչ այժմ ոչ մի կոնկրետ քայլ չի ձեռնարկվել: Մենք ուղղակի արդեն չգիտենք ինչ անենք»,- նշում է հասարական դաշինքի համակարգողը:
«Էկոլուր» տեղեկատվական Հկ-ի նախագահ Ինգա Զարաֆյանի խոսքով` Շահումյան հանքի բաց շահագործումն էկոլոգիական աղետ կլինի: «Սա ամենամեծ վտանգն է, որ կարող է Կապանի գլխին գալ»,-նշում է նա: Ըստ էկոնոսֆերայի կենտրոնի հետազոտությունների` Կապանն արդեն գտնվում է էկոլոգիական աղետալի վիճակում: «Հետազոտությունները ցույց են տվել, որ արդեն իսկ ծանր մետաղներով աղտոտվածությունն անտանելի բարձր է: Քաջարանն էլ է ծանր վիճակում, ու եկեք չմոռանանք, որ այնտեղի պոչամբարը, որ հավաքում է Քաջարանի թափոնները, գտնվում է հենց Կապանի կողքին: Հիմա եթե դրան գումարվի այդ փոշին, որ լի է ծանր մետաղներով, իսկ Շահումյանի հանքավայրն հենց Կապանի տարածքում է, չեմ ուզում պատկերացնել, թե ինչ էկոլոգիական վիճակում կհայտնվի Կապանը»,-Առաջին լրատվականի հետ զրույցում նշեց Ինգա Զառաֆյանը:
Հայ բնապահպանների համոզմամբ Թեղուտից հետո սա երկրորդ մեծ հանցագործությունն է, որ իրագործում է պետությունը սեփական ժողովրդի հանդեպ: