Թուրքական Radikal թերթն անդրադարձել է երկու օր առաջ Hürriyet թերթում հրապարակված Ուղուր Էրգանի հոդվածին, որում խոսք էր գնում Հայաստանի և Տուվալուի միջև դիվանագիտական հարաբերությունների հաստատման մասին:
Հոդվածում կարծիք էր հայտնվում, թե Հայաստանի այդ քայլը միտված է նրան, որ Տուվալուն ճանաչի Լեռնային Ղարաբաղի անկախությունն ու Հայոց ցեղասպանությունը: Դրանով իսկ Տուվալուն կարող է դառնալ Լեռնային Ղարաբաղի անկախությունը ճանաչած աշխարհի առաջին երկիրը:
Այս կապակցությամբ Radikal թերթը հիշեցնում է, որ 2008 թվականի սեպտեմբերի 25-ին ՄԱԿ ԳԱ 63-րդ նստաշրջանի շրջանակներում Թուրքիայի արտգործնախարար Ահմեդ Դավութօղլուն հանդիպել էր Տուվալուի վարչապետ Ափիսաի Լելեմիայի հետ: Վերջինս 2009 թվականին ժամանել է Ստամբուլ և կնքել համապարփակ համագործակցության ու փոխըմբռնման համաձայնագիր:
«Ինչի՞ կարիք ունեք» հարցին Տուվալուի վարչապետն իր պատասխանով զարմացնում է ներկաներին՝ ընդգծելով, որ իրենց երեխաների համար Ավստրալիայից բերված ռեգբիի գնդակները հարմար չեն եվրոպական ֆուտբոլ խաղալու համար: Արդյունքում, Թուրքիան հարյուրավոր ֆուտբոլային գնդակներ և դրանք փչելու սարքեր է տրամադրում Տուվալուին:
Թերթն ընդգծում է, որ եթե ներկայումս Տուվալուն ճանաչի Լեռնային Ղարաբաղի անկախությունը, ապա իրենք կարող են հետ պահանջել իրենց ուղարկած գնդակներն ու փչելու սարքեր:
