«Սոված խաղեր» ֆիլմը հյուսիսամերիկյան վարձույթում հավաքել է 155 մլն դոլար,- հաղորդում է Associated Press-ը:
Ֆիլմը հյուսիսամերիկյան կինովարձույթի պատմության մեջ ցուցաբերել է երրորդ արդյունքը՝ պրեմիերային հանգստյան օրերին հավաքած գումարի չափով՝ զիջելով միայն «Հարի Փոթերի» վերջին մասին (2011 թ.՝ 169.2 մլն դոլար) և «Սև ասպետին» (2008 թ.՝ 158.4 մլն դոլար):
Ընդ որում, ԱՄՆ-ի և Կանադայի սահմաններից դուրս «Սոված խաղերը» շատ ավելի համեստ սկիզբ է դրել՝ 67 երկրներում հավաքելով ընդամենը 59.3 մլն դոլար:
Ֆիլմը ստեղծվել է Սյուզան Քոլինզի համանուն եռապատման առաջին գրքի հիման վրա: Ֆիլմի սյուժեն զարգանում է ապագա պետությունում, որը ձևավորվել է նախկին ԱՄՆ տարածքում, որտեղ իշխանությունները ամեն տարի հատուկ ընտրված դեռահասների շրջանում գոյատևման մրցույթներ են անցկացնում:
Գործակալությունը նշում է, որ եռապատման առաջին մասի նման հաջողությունից հետո հնարավոր է, որ մյուս մասերն էլ էկրանավորվեն:
