1958թ. այս օրը Երևանում մահացավ բանաստեղծ, գրական-հասարակական գործիչ, ԽՍՀՄգրողների միության անդամ (1934-ից) Ազատ Վշտունին (Կարապետ Սեթի Մամիկոնյան):
Ծնվել է 1894թ. հուլիսի 17-ին Արևմտյան Հայաստանի Վան քաղաքում, նախնական կրթությունն ստացել է տեղի Երեմյան դպրոցում։ 1908-1911թթ. սովորել է Կ. Պոլսի կենտրոնական վարժարանում։ 1911-ին մեկնել է Փարիզ և դարձել Սորբոնի համալսարանի գրական-փիլիսոփայական ֆակուլտետի ազատ ունկնդիր։ 1914-ին մեկնել էԹիֆլիս։
1918-1919թթ. աշխատել է Թիֆլիսի հին Ներսիսյան որբանոցում, որտեղ հիմնադրել է «Փարոս» տպագիր հանդեսը, 1919-1920-ին եղել է Ղրիմում։ Հայրենադարձության գործով 1921-ին մեկնել է Իրան և Իրաք։
Խմբագրել է «Մուրճ» ամսագիրը (1922), «Դիրքերում» երկշաբաթաթերթը (Թիֆլիս, 1924), «Մուրճ-մանգաղ» թերթը (Հյուսիսային Կովկաս, Դոնի Ռոստով, 1926-1927),«Գեղարվեստի ֆրոնտում», «Խորհրդային Հայաստան»-ի գրական հավելվածը (Երևան, 1930), «Խորհրդային արվեստ» (Երևան, 1932-1934) ամսագիրը։
Եղել է Խորհրդային Հայաստանի գրողների ասոցացիայի նախագահը, Հայաստանի պրոլետարական գրողների ասոցացիայի ներկայացուցիչը Մոսկվայում (1925)։ Գրական «Երեքի խմբակ»-ի (Եղիշե Չարենց, Գևորգ Աբով, Ազատ Վշտունի) անդամներից է։
Նրա ստեղծագործությունները թարգմանվել են ռուսերեն, ուկրաիներեն, վրացերեն, չինարեն և այլ լեզուներով։