Թուրքական Hürriyet թերթում հրապարակվել է Ուղուր Էրգանի «Հայաստանի տուվալուական խաղը» խորագրով հոդվածը, որում ասվում է.
«Լեռնային Ղարաբաղը վերահսկող Հայաստանը դիվանագիտական հարաբերություններ է հաստատել Խաղաղ օվկիանոսում գտնվող Տուվալու փոքր կղզու հետ, որը նախորդ տարի տրված գումարի դիմաց ճանաչեց Աբխազիայի և Հարավային Օսիայի անկախությունը:
Հայաստանի ղեկավարությունը մի կողմից ապրիլի 24-ին ընդառաջ քայլեր է ձեռնարկելու բազմաթիվ երկրներում ցեղասպանության ճանաչման հարցն օրակարգ բերելու, իսկ մյուս կողմից էլ Լեռնային Ղարաբաղի անկախության միջազգային ճանաչման ուղղությամբ: Հենց այդ նպատակով էլ Հայաստանը մարտի 16-ին դիվանագիտական հարաբերություններ հաստատեց Տուվալուի հետ:
Պաշտոնական Անկարան համակ ուշադրությամբ հետևում է Հայաստանի ու Տուվալուի մերձեցման գործընթացին: Դրա պատճառն այն է, որ նախորդ տարի Տուվալուն ստացած գումարի դիմաց ճանաչեց Ռուսաստանի օժանդակությունը վայելող Աբխազիայի ու Հարավային Օսիայի անկախությունը: Արևմտյան երկրների հետ իր հարաբերությունները չփչացնելու պատճառով Լեռնային Ղարաբաղի անկախությունը չճանաչող Հայաստանը կարող է գումար առաջարկել Տուվալուին՝ Լեռնային Ղարաբաղի անկախության ճանաչման համար:
Հակառակ դեպքում, ի՞նչ կարիք կար, որ Հայաստանը դիվանագիտական հարաբերություններ հաստատեր իրենից 15,000 կիլոմետր հեռավորության վրա գտնվող խաղաղօվկիանոսյան կղզու հետ, որի բնակչությունը կազմում է ընդամենը 12,000 մարդ:
Ուշագրավ է, որ Տուվալուի հետ դիվանագիտական հարաբերություններ հաստատելուց հետո Հայաստանի արտգործնախարար Էդվարդ Նալբանդյանը «աշխատանքային այցով» մեկնեց Վրաստան, ուր նա այդ կապակցությամբ պարզաբանումներ տվեց Վրաստանի ղեկավարությանը (Աբխազիայի ու Հարավային Օսիայի անկախության ճանաչման պատճառով Վրաստանը խզել է Տուվալուի հետ իր դիվանագիտական հարաբերությունները.- 1 in.am):
Այժմ Անկարան փորձում է պարզել, թե արդյոք Ռուսաստա՞նն է կանգնած Հայաստանի տուվալուական խաղի հետևում, թե՞ ոչ: Ռուսաստանը դժգոհ է Մալաթիայի նահանգի Քյուրեջիք շրջանում ՆԱՏՕ-ի ռադիոտեղորոշիչ կայանի տեղակայումից և Սիրիայի նկատմամբ Թուրքիայի որդեգրած դիրքորոշումից: Եթե Անկարան պարզի, որ Ռուսաստանն աջակցում է Հայաստանի տուվալուական խաղին, ապա ամենևին էլ չի զարմանա: Ռուսաստանն Աբխազիայի ու Հարավային Օսիայի անկախության ճանաչման համար Տուվալուին տվել է 3,5-4 միլիոն դոլար»: