ԱՄՆ նախագահ Բարաք Օբաման մարտի 27-ին պատրաստվում է հանդիպել Պակիստանի վարչապետ Յուսուֆ Գիլանիի հետ: Սպիտակ տան տարածած տեղեկության համաձայն` հանդիպումը տեղի է ունենալու Հարավային Կորեայում անցկացվող միջուկային անվտանգության թեմայով գագաթնաժողովի ժամանակ: Այս մասին հաղորդում է «Ազատություն» ռադիոկայանը:
Այս հանդիպումը հատկանշական է նրանով, որ այն կանցկացվի ամենաբարձր մակարդակով` Պակիստանում ամերիկյան զինվորականների կողմից «թիվ մեկ» ահաբեկիչ Ուսամա բեն Լադենին ոչնչացնելուց հետո, ինչի մասին նրանք նախապես տեղյակ չէին պահել պակիստանյան իշխանություններին:
Երկու երկրների միջև հարաբերություններն էլ ավելի լարվեցին այն բանից հետո, երբ ամերիկյան անօդաչու ինքնաթիռը նոյեմբեր ամսին իրականացրած ռմբակոծության ժամանակ աֆղանա-պակիստանյան սահմանագծի մոտ սպանեց պակիստանցի 24 զինվորականի:
