Թեհրանի ԱԳՆ-ն իր դժգոհությունն է հայտնել Թեհրանում Ադրբեջանի դեսպան Ջավանշիր Ահունդովին` կապված 22 ադրբեջանցի քաղաքացիների ձերբակալության հետ:
Հիշեցնենք, որ ազգային անվտանգության նախարարությունը Բաքվում ձերբակալել էր Ադրբեջանի 22 քաղաքացիների՝ Իրանի հեղափոխական գվարդիայի հետ համագործակցելու մեղադրանքով: Հաղորդվել էր, որ գվարդիայի հրամանով ադրբեջանցիները պետք է ահաբեկչական գործողություններ իրականացնեին ԱՄՆ-ի և Իսրայելի դեսպանատների և դրանց աշխատակիցների դեմ:
Նախարարությունը նաև հաղորդել էր, որ ձերբակալվածները դասընթացներ են անցել Իրանի ռազմական ճամբարներում, որոնց ընթացքում, ըստ Agent France Presse-ի հաղորդման, ադրբեջանցիները սովորել են տիրապետել զենքին, ինչպես նաև լրտեսական ունակություններ են ձեռք բերել։
Թեհրանի ԱԳՆ-ն պաշտոնապես հերքել է բոլոր մեղադրանքները: Թեհրանում ընդգծել են, որ Բաքվի գործողությունները հակասում են Ադրբեջանի, Իրանի, Թուրքիայի ԱԳՆ նախարարների եռակողմ հանդիպման ժամանակ երկու երկրների արտգործնախարարությունների միջև ստորագրված համաձայնագրերին:
Ահունդովն իր հերթին հայտարարել է Իրանի հետ համագործակցության ոլորտներն ընդլայնելու Ադրբեջանի ձգտման մասին: Նա նաև ասել է, որ Թեհրանի դժգոհությունը կփոխանցի իր երկրի կառավարությանը: