Ըստ ընտրական օրենսգրքի՝ պարտադիր չէ, որ ազգային փոքրամասնությունները մասնակցեն ընտրություններին, սակայն «Մեդիա Շանգալ» եզդիների ազգային միավորման նախագահ Ամո Շարոյանը հավաստեց, որ եզդիները պարտադիր մասնակցելու են. «Ընտրելու իրավունքը մեր բոլորի սահմանադրական իրավունքն է, ինչպես բնիկ ժողովուրդը, այնպես էլ ազգային փոքրամասնությունները, մասնավորապես՝ եզդիները պիտի մասնակցեն ընտրություններին, որովհետև դա հնարավորություն է տալիս անձին մասնակցել երկրի հասարակական-քաղաքական կյանքին»:
«Առաջին լրատվական»-ի հետ զրույցում Ամո Շարոյանը նշեց նաև, որ իրենք ուզում են, որ ընտրություններն անցնեն թափանցիկ, արդար և արժանահավատ, իսկ դրա համար պետք է, որ եզդիներից նույնպես լինեն օրենսդիր մարմնում. «ԱԺ-ն բաղկացած է 131 անդամներից, ես ասացի՝ ստորակետ դնենք, ավելացնենք՝ որոնցից 25%-ը կանայք և 3-4%-ը ազգային փոքրամասնության ներկայացուցիչներ են: Կանանց հարցը լուծվեց, ազգային փոքրամասնություններինը՝ դեռևս ոչ»:
«Մեդիա Շանգալ» միավորումը, նախագահի խոսքերով, աջակցելու է Հանրապետական կուսակցությանը. «Եզդիները միշտ ցանկացել են ամուր պետականություն ունենալ, ՀՀԿ ղեկավարը մեր երկրի նախագահն է, և մենք կողմ ենք նրա կարգախոսին՝ հավատանք, փոխենք»:
Ա. Շարոյանը նաև ասաց, որ եզդիները մեծամասնական համակարգով ընտրություններին մասնակցել չեն կարողանա, չնայած իրենց թիվը կազմում է 50-60 հազար. «Չնայած ունենք եզդիաբնակ գյուղեր, բայց այդ գյուղերը սփռված են ամբողջ հանրապետությունով մեկ, և մենք ի վիճակի չենք այդ գյուղերի ձայները հավաքել»:
Փոխարենը նա հույս հայտնեց ընտրություններին մասնակցել համամասնական համակարգով և առաջադրվել ՀՀԿ ցուցակում. «Համամասնականով կուզենայի ես առաջադրվել, բայց քանի որ ցուցակները դեռ պատրաստ չեն, չեմ կարող ասել՝ ով կընդգրկվի այնտեղ»:
