Վերջին 4 տարիների զեկույցներն ուղղված են եղել Մարտիմեկյան դեպքերը կոծկելուն: Այսօր «Առաջին լրատվական»-ի հետ զրույցում նման տեսակետ հայտնեց Հայ ազգային կոնգրեսի արտաքին հարաբերությունների հանձնաժողովի անդամ Մարթա Այվազյանը: Նա նշեց, որ
դրա վառ ապացույցն է այն, որ անցյալ տարի Սերժ Սարգսյանի հանձնարարականից հետո որևէ կերպ մարտիմեկյան սպանությունների բացահայտումն առաջ չի գնացել: «Ավելին՝ ՀՔԾ զեկույցը բացարձակապես ոչինչ չավելացրեց: Այն միայն վերաշարադրեց մեղադրականները, նաև փորձ արվեց ներկայացնել, թե զոհերը հանցագործներ են»,- ասաց Մ. Այվազյանը`հավելելով, որ մարտիմեկյան դեպքերի բացահայտումը դեռ օրակարգային հարց է միջազգային կազմակերպությունների շնորհիվ:
Արձագանքելով ԵԽԽՎ համազեկուցողների այն դիտարկմանը, թե Մարտի 1-ի զոհերի հարազատները պետք է ներգրավվեին քննությանը` նա ծնողների հնարավոր մասնակցությունը հետաքննության ընթացքին անհրաժեշտ համարեց: Մ. Այվազյանի կարծիքով` ծնողներին ոչ թե պետք է փաստի առաջ կանգնեցնեին, այլ պետք է գործընթացի վերահսկողության հնարավորություն տային:
Հայ ազգային կոնգրեսի արտաքին հարաբերությունների հանձնաժողովի անդամը նաև խոսեց Սերժ Սարգսյանի այն հանձնարարականի շուրջ, ըստ որի` Դավիթ Հարությունյանը պետք է մշակեր հայեցակարգ՝ անցկացնելու հանրային լսումներ քրեական հետաքննության արդյունքների վերաբերյալ: Ըստ նրա` լսումներ անցկացնելով կհամարվի, որ ինչ-որ քայլ արվել է, բայց նման ձևակերպումը միայն ժամանակ ձգձգելու նպատակ ունի: «Հետաքննության արդյունքների վերաբերյալ լսումներ անցկացնելն անարդյունք եմ համարում: Դա ժամանակ ձգձգելու նպատակ ունի, սակայն պետք է հիշել, որ նման հանցագործությունները երբեք չեն մոռացվում»,- եզրափակեց իր խոսքը Մարթա Այվազյանը:
Հիշեցնենք, որ ԵԽԽՎ Մոնիտորինգային կոմիտեի համազեկուցողները տեղեկացրել էին, որ ՀՀ նախագահ Սերժ Սարգսյանը հայտնել էր, թե բաց է իրենց առաջարկների քննարկման համար և խնդրել է Դավիթ Հարությունյանին մշակել հայեցակարգ՝ անցկացնելու հանրային լսումներ քրեական հետաքննության արդյունքների վերաբերյալ. «Միևնույն ժամանակ նա հայտնեց իր մտահոգությունը, որ այս խնդիրը քաղաքականացվել է և կարող է շահարկվել քաղաքական նպատակներով՝ հատկապես 2012 թ. մայիսի 6-ի խորհրդարանական ընտրությունների համատեքստում: Ուստի նա առաջարկեց, որ լսումների ժամանակն ընտրվի այնպես, որ նվազագույնի հասցվի հնարավորությունը՝ շահարկելու այն նախընտրական քարոզչական նպատակներով»: