Ռեժիսոր վավերագիր Դևիս Գուգենհայմի նկարահանած՝ Օբամայի նախընտրական քարոզարշավի առաջին տեսահոլովակը ցուցադրվել է Դեմոկրատական կուսակցության տարբեր միջոցառումներում:
17 րոպեանոց ֆիլմի պրեմիերան ամբողջ երկրում տեղի է ունեցել հինգշաբթի երեկոյան կուսակցության տարբեր միջոցառումներում և նախագահի քարոզարշավի կայքում: Դաշնային ընտրական հանձնաժողովի տվյալներով՝ տեսահոլովակի նկարահանումները, կադրից դուրս հնչող տեքստը, որը կարդում է հոլիվուդյան դերասան Թոմ Հենքսը, Օբամայի նախընտրական շտաբին արժեցել են 345,353 դոլար:
Ֆիլմը սկսվում է ԱՄՆ պատմութան մեջ ամենածանր ժամանակաշրջանի՝ տնտեսական ճգնաժամի մասին պատմությամբ, որը տեղի է ունեցել Ջորջ Բուշ կրտսերի կառավարման վերջին ամիսներին և նոր նախագահի կառավարման սկզբում: 2008-2012 թթ. ընթացքում Օբամայի ընտրարշավի գլխավոր ստրատեգ Դևիդ Աքսելրոդի խոսքերով՝ Օբամայի կառավարման առաջին 6 ամիսները ամենամեծ փորձությունն են եղել նրա համար, և հենց այդ ընթացքում են ձևավորվել նրա բնավորության գծերը՝ կոշտություն, վճռականություն, ամենաբարդ որոշումներ կայացնելու ժամանակ պատասխանատվություն վերցնելու կարողություն:
Ֆիլմում նշվում է, որ ճգնաժամը հաղթահարելու գործում Օբամայի գլխավոր հաջողություններից է նրա առաջարկած և Կոնգրեսի կողմից ընդունված՝ 787 մլրդ դոլարի հակաճգնաժամային փաթեթի ընդունումը և GM և Chrysler խոշոր ավտոարտադրողներին բազմամիլիարդանոց օգնության տրամադրումը:
Տեսանյութի այս հատվածում հեղինակներն իրենց թույլ են տվել միակ «հարձակումը» Օբամայի գլխավոր հակառակորդ Մասաչուսեթսի նախկին նահանգապետ Միթ Ռոմնիի հասցեին: Հոլովակի հեղինակները հիշեցնում են Ռոմնիի այն հայտարարությունը, որ ավտոարտադրողների սնանկացումը միակ տարբերակն է:
Օբամայի հաջորդ կարևոր հաջողությունը առողջապահության ոլորտում նրա ընդունած օրենքն է: Հատկանշական է, որ այս ամիս Գերագույն դատարանը որոշում կկայացնի՝ արդյո՞ք այդ օրենքը համապատասխանում է Սահմանադրությանը: Տեսանյութի այս մասում Օբաման կարճ պատմում է, թե ինչպես է իր մայրը հիվանդ եղել, և թե ինչպես են նրա բուժման վրա ծախսվել ընտանիքի բոլոր խնայողությունները, սակայն, այնուամենանիվ, նրան չի հաջողվել փրկել:
Այնուհետև տեսանյութի հեղինակներն անդրադառնում են ԱՄՆ արտաքին քաղաքականության այն հարցերին, որոնք հետաքրքրում են ամերիկացիներին՝ Իրաքում պատերազմի ավարտը և «թիվ մեկ ահաբեկիչ» Ուսամա Բեն Լադենի չեզոքացումը:
Հատկանշական է, որ տեսահոլակում չի հնչում «Աֆղանստան» բառն այն դեպքում, երբ այդ երկիր լրացուցիչ զորք ուղարկելու որոշումը նախագահի ամենադժվար քայլերից մեկն էր: Բացի այդ, ի տարբերություն Իրաքի, Աֆղանստանը շարունակում է մնալ ամերիկացիներին անհանգստացնող արտաքին քաղաքականության գլխավոր թեմաներից մեկը:
Ֆիլմի վերջում բավական կարճ թվարկվում են Օբամայի մյուս բոլոր արժանիքները։
«Մենք դեռ կտեսնենք այն բոլոր բարդ որոշումների արդյունքները, որոնք նա ընդունլ է ոչ թե քաղաքական միավորներ հավաքելու, այլ ապագայի փոփոխությունների համար: Հիշեք՝ ինչի միջով ենք մենք անցել, և սպասեք, թե դեռ ինչ կլինի»,- կադրի ետևում հնչում է Թոմ Հենքսի ձայնը, և ֆիլմ ավարտվում է: