Լիբանանում Al-Jazeera հեռուստաընկերության նախկին լրագրող Ալի Հաշեմը հայտարարել է, որ դուրս է եկել աշխատանքից Սիրիայի նկատմամբ դիրքորոշման հարցում ղեկավարության հետ ունեցած տարաձայնությունների պատճառով: Россия 24 հեռուստաալիքին տված հարցազրույցում լրագրողը պատմել է, որ անձամբ է տեսել՝ ինչպես են տասնյակ զինված անձինք անցնում Սիրիայի սահմանը՝ Բաշար Ալ-Ասադի կառավարության դեմ կռվելու համար:
Ըստ այդ տեղեկության՝ այս շաբաթ աշխատանքից ազատվել են Al-Jazeera-ի 3 լրագրողներ, այդ թվում՝ Բեյրութում հեռուստաընկերության գրասենյակի գործադիր տնօրեն Հասան Շաաբանը: Նման ձևով լրագրողներն իրենց բողոքն են հայտնել Սիրիայում և Բահրեյնում տեղի ունեցող իրադարձությունների առնչությամբ հեռուստաընկերության ոչ օբյեկտիվ դիրքորոշման դեմ: Շաաբանի խոսքերով՝ Al-Jazeera-ն հենց սկզբից որդեգրել է կողմնակալ և սադրող դիրքորոշում:
Ալի Հաշեմը հայտարարել է, որ իշխանություններին հենց սկզբից դիմադրում էին զինված խմբավորումները: «Ապստամբության հենց սկզբում առաջին հուզումները խաղաղ չէին. արդեն այդ ժամանակ այնտեղ կային զինված մարդիկ: Ես դա տեսել եմ սեփական աչքերով, և հնարավոր է՝ դա Al-Jazeera-ից իմ հեռանալու առաջին պատճառներից էր: Ես տեսել եմ, թե ինչպես են զինված անձինք Լիբանանի սահմանով անցնում Սիրիա: Նրանք մեկը չէին, երկուսը չէին, նրանք տասնյակներով էին, և նրանք բախումների մեջ էին մտնում կառավարական ուժերի հետ: Ես ամեն ինչ տեսել եմ սեփական աչքերով, և կարիք չունեմ որևէ մեկին հարցնելու՝ ինչպես է դա եղել»,- պատմել է Ալ-Հաշեմը:
Հիշեցնենք. Սիրիայում ուղիղ մեկ տարի է՝ շարունակվում են բախումները կառավարական ուժերի և ընդդիմության միջև, որոնք վերջին ամիսներին վերածվել են քաղաքացիական պատերազմի: Պաշտոնական Դամասկոսը կատարվածի ողջ պատասխանատվությունը դնում է զինված ահաբեկչական խմբավորումների վրա, որոնք սպանում են խաղաղ քաղաքացիներին և մեղքը բարդում իշխանությունների վրա: ՄԱԿ-ի վերջին տվյալնեով՝ մեկ տարվա ընթացքում Սիրիայում զոհվել է ավելի քան 8000 մարդ:
