Ինչպես հայտնում է Press TV-ն, Եվրամիության արտաքին գործերի և անվտանգության քաղաքականության հարցերով գերագույն ներկայացուցիչ Քեթրին Էշթոնն այցելել է Թուրքիա, որպեսզի նախապատրաստական աշխատանք տանի հունվարի վերջին «վեցյակի» և Իրանի միջև միջուկային ծրագրով սկսվող բանակցություններին ընդառաջ:
Էշթոնը հանդիպել է Թուրքիայի արտաքին գործերի նախարար Ահմեդ Դավութօղլուի հետ, որպեսզի ամուր հիմք ստեղծի առաջիկա բանակցությունների հաջողության համար:
Քննարկվել են նաև Թուրքիայի և Եվրամիության միջև հարաբերությունները: Ավելի վաղ Դավութօղլոււն հանդիպել է Իրանի ազգային անվտանգության գերագույն խորհրդի քարտուղարի տեղակալ Ալի Բաքերիի հետ, ինչը նշանակում է, որ Դավութօղլուն ուղերձներ էր ստացել իրանական կողմից, որը պետք է փոխանցեր եվրոպացի իր պաշտոնակցին:
Հիշեցնենք միայն, որ վերջին բանակցությունները տեղի էին ունեցել դեկտեմբերի 6-7-ը շվեյցարական Ժնև քաղաքում, որից հետո կողմերը որոշել էին հերթական փուլն անցկացնել Ստամբուլում 2011 թ. հունվարի 21-22-ը: