Աֆղանստանի նախագահ Քարզայը պահանջել է, որպեսզի ՆԱՏՕ-ի զորքերը լքեն աֆղանական գյուղերի տարածքը և վերադառնան ռազմական բազաներ: Քարզայն այս մասին ասել է այն բանից հետո, երբ ԱՄՆ զինվորը սպանել է Կանդահար նահանգի գյուղերից մեկի 16 բնակչի: Այս մասին հաղորդում է BBC-ն:
«Անվտանգության ապահովման միջազգային ուժերը պետք է լքեն աֆղանական ղշլաղներում հենակետերը և վերադառնան իրենց բազաներ»,-ասել է Քարզայը: Այս հայտարարությունը հետևել է թալիբների նախազգուշացմանը, որով նրանք սպառնացել են պատժիչ գործողություններ սկսել ամերիկացիների դեմ և վրեժ լուծել 16 գյուղացիների սպանության համար:
Հիշեցնենք, որ միջադեպը տեղի էր ունեցել մարտի 11-ին, երբ իրաքյան պատերազմի ժամանակ գլխի լուրջ վնասվածք ստացած զինվորը մտել էր աֆղանական գյուղ և մեկը մյուսի ետևից սպանել 16 աֆղանցիների, այդ թվում՝ կանանց և երեխաների:
