Մարտի 15-ին ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովը Արտակ Դավթյանի նախագահությամբ քննարկվել է ՀՀ կառավարության ներկայացրած «Գովազդի մասին» ՀՀ օրենքում լրացումներ կատարելու մասին» օրինագիծը: Երևանի քաղաքապետի տեղակալ Կամո Արեյանի ներկայացմամբ` օրինագծի նպատակն է կանոնակարգել Երևան քաղաքում գովազդային օրենսդրության նկատմամբ վերահսկողությունը և պատասխանատվության ենթարկել օրինախախտներին:
Սահմանվել է, որ Երևանի քաղաքապետն իրավասու է տուգանք կիրառել համապատասխան համայնքի տարածքում արտաքին գովազդ տեղադրելու թույլտվության պայմանների խախտման մասին իր ծանուցագրերի պահանջների կատարումից խուսափելու կամ ժամանակին չկատարելու, ինչպես նաև համայնքում առանց թույլտվության արտաքին գովազդ տեղադրելու համար: Սահմանվել է, որ գովազդատուները, գովազդ արտադրողները, գովազդակիրները սահմանված խախտումների համար կենթարկվեն վարչական պատասխանատվության: Երևանի քաղաքապետն իրավունք կունենա կիրառելու տուգանք` նվազագույն աշխատավարձի մինչև 100-ապատիկի չափով:
Օրինագծի առաջին և երկրորդ ընթերցմամբ քննարկումները նախատեսվում է իրականացնել 24 -ժամյա ընթացակարգով:
Նախագիծը ստացել է հանձնաժողովի դրական եզրակացությունը` ԱԺ առաջիկա քառօրյա նիստերի օրակարգում ընդգրկվելու համար:
Հանձնաժողովը երրորդ ընթերցմամբ քննարկել է ՀՀ կառավարության և պատգամավորներ Հեղինե Բիշարյանի, Նաիրա Զոհրաբյանի, Անահիտ Բախշյանի, Լիլիթ Գալստյանի հեղինակած «Գրադարանների և գրադարանային գործի մասին» օրինագիծը: ՀՀ մշակույթի նախարարի տեղակալ Արթուր Պողոսյանը տեղեկացրեց, որ այն շուրջ 60 առաջարկների հաշվառումով լրամշակվել է:
Նախագիծը ստացել է դրական եզրակացություն: Այս մասին «Առաջին լրատվական»-ին հայտնում են ԱԺ հասարակայնության և տեղեկատվության միջոցների հետ կապերի վարչությունից:
