Այսօր «Դոնբաս Արենա»-ում կազմակերպված մամուլի ասուլիսի ժամանակ «Շախտյոր»-ի կիսապաշտպան Հենրիկ Մխիթարյանը հարցազրույց է տվել ռուսական մամուլին:
– Հենրի´կ, առաջին շրջանում «Շախտյոր»-ը դժվար հանդիպում անցկացրեց «Չերնոմորեց»-ի հետ (2:2): Արդյո՞ք շաբաթ օրը թիմին հեշտ խաղ է սպասվում:
– «Շախտյոր»-ի համար հեշտ հակառակորդներ գոյություն չունեն, ցանկացած հանդիպման մենք մոտենում ենք ուժերի առավելագույն լարումով: Ընդամենը 8 հանդիպում է մնացել և մենք պետք է ամեն ինչ անենք, որպեսզի հաղթանակ տոնենք բոլոր խաղերում և ետ չմնանք «Դինամո»-ից:
– Ի՞նչ եզրահանգումներ եք արել առաջին շրջանում «Չերնոմորեց»-ի հետ կայացած հանդիպումից հետո:
– Կարծում եմ՝ այդ հանդիպման խաղավերջում մենք կորցրեցինք զգոնությունը, ինչն էլ բաց թողնված գնդակի պատճառ դարձավ: Համոզված եմ, որ նման բան տեղի չի ունենա «Դոնբաս Արենա»-ում:
– Այդ հանդիպման ժամանակ Դուք գոլի հեղիանակ դարձաք: «Չերնոմորեց»-ի դարպասը գրավել եք նաև «Մետալլուրգ»-ի կազմում: Մի՞թե գտել եք այդ թիմերի դեմ պայքարելու գաղտնիքը:
– Ոչ մի գաղտնիք էլ չկա: Կարող եմ ասել, որ ինձ համար մեծ պատիվ է գոլեր հեղինակել և օգնել թիմին հաղթանակներ տոնել:
– Վերջերս շատ է խոսվում «Շախտյոր»-ի կողմից չիրացված գոլային պահերի մասին, ինչպես դա եղավ «Դնեպր»-ի և «Իլիչևեց»-ի հետ հանդիպումների ժամանակ…
– Կարծում եմ՝ «Չերնոմորեց»-ի հետ կայանալիք հանդիպման ժամանակ մենք այդ խնդրի առաջ չենք կանգնի:
– Փետրվարի 15-ին կայանալու է Ուկրաինայի Գավաթի խաղարկության վիճակահանությունը: Կա՞ն հակառակորդներ, որոնց հետ Դուք կցանկանաք հանդիպել:
– Այդպիսի հակառակորդներ չկան:
– Հենրի´կ, Դուք դարձաք «Շախտյոր»-ի պատմության մեջ 1700-րդ գնդակի հեղիանկը՝ գոլ խփելով «Դնեպր»-ի հետ կայացած հանդիպման ժամանակ: Ինչ զգացումներ առաջացան:
– Ես ինձ շատ լավ եմ զգում: Շատ ուրախ եմ, որ կարողացա իմ անունը թողնել «Շախտյոր»-ի պատմության մեջ:
– Դուք երկրպագուների սիրելի ֆուտբոլիստներից եք: Հարցման արդյունքում դարձել եք ամսվա լավագույն ֆուտբոլիստ, ճանաչվել եք Հայաստանի 2011 թվականի լավագույն ֆուտբոլիստ: Այս ամենը ճնշու՞մ է ձեզ հանդիպումների ժամանակ:
– Հաճելի է դառնալ քո երկրի և ակումբի լավագույն ֆուտբոլիստը: Դա պարտավորեցնում և խթան է հանդիսանում ավելի լավ հանդես գալու ու ավելի շատ մարզվելու համար:
