ԼՂՀ-ում գոյություն չունեն հավասար կամ անհավասար կանոններ, և բոլորը մի կանոնով են շարժվում: «Առաջին լրատվական»-ի հետ զրույցում նման հավաստիացում արեց ԼՂՀ գործարարների միության նախագահ Դավիթ Դադայանը: Նրա խոսքով՝ եթե կա կոնկրետ բիզնես-ծրագիր, որը բավարարում է բոլոր պահանջները, ապա ԼՂՀ-ում գործում է հիմնադրամ, որը սուբսիդավորում է բանկերի տրամադրած վարկերը և բիզնեսի հիմնումը դժվարություններ չի հարուցում:
«Հիմնադրամի գոյությունը մեծ ներդրումներ է, և բիզնես միջավայրը դրանից միայն օգտվում է: Եթե բանկը վարկեր է տրամադրում 15%-ով, հիմնադրամը սուբսիդավորում է 9%-ը և տնտեսվարողը մարում է միայն 6%»,- ասաց Դ. Դադայանը՝ հավելելով, որ առանց հիմնադրամի աջակցության՝ շատ մեծ խնդիրներ են լինում, և բիզնեսը ինքն իր հունով առաջ գնալ չի կարողանում:
Դ. Դադայանը հայտնեց, որ ներդրումներ ներգրավելու համար մի մեծ ծրագիր է նախապատրաստվում, որը ներկայացվելու է Համահայկական առևտրային ցանցի տարեկան առաջին ժողովին:
