Այս տարի Բահրեյնն ու Բելառուսը ավելացել են այն 10 երկրների ցանկում, որոնք «Լրագրողներ առանց սահմանների» կազմակերպության կողմից ճանաչվել են որպես «համացանցի թշնամիներ»:
BBC-ն գրում է, որ ցուցակում հայտնվում են այն երկրները, որոնք սահմանափակում են համացանցից օգտվելու հնարավորությունը, իրականացնում են գրաքննություն և ազատազրկման են ենթարկում բլոգերներին:
Կազմակերպությունն ասում է, որ 2011 թվականը «մահացու տարի է» եղել համացանցից օգտվողների համար: Համացանցի միջոցով քարոզարշավ իրականացնողների 199 ձերբակալություն է գրանցվել, որը 31 տոկոսով ավել է, քան 2010 թվականին:
Այսպիսով ցուցակում հայտնված երկրներն են Բահրեյնը, Բելառուսը, Բուրման, Չինաստանը, Կուբան, Իրանը, Հյուսիսային Կորեան, Սաուդյան Արաբիան, Սիրիան, Թուրքմենստանը, Ոիզբեկստանը և Վիետնամը:
Կազմակերպությունն ասել է, որ Չինաստանում Իրանում և Վիետնամում ամենամեծ թվով բանտարկյալներն են, ովքեր ձերբակալվել են համացանցից օգտվելու պատճառով:
Կազմակերպությունը հրապարակել է նաև այն երկրների ցանկը,որոնք գտնվում են վերահսկողության տակ և հնարավոր է, որ շուտով ճանաչվեն որպես «համացանցի թշնամի»:
Համացանցի հավանական թշնամիների ցուցակում են Ավստրալիան, Եգիպտոսը, Էրիթրեան, Ֆրանսիան, Հնդկաստանը, Ղազախստանը, Մալայզիան, Ռուսաստանը, Հարավային Կորեան, Շրի Լանկան, Թուրքիան և Արաբական Միացյալ Էմիրությունները: