Եգիպտոսի Ժողովրական ժողովը (խորհրդարանի ստորին պալատը) միաձայն հավանություն է տվել Կահիրեից Իսրայելի դեսպանին արտաքսելու և իրենց դեսպանին Թել Ավիվից հետ կանչելու որոշմանը: Բացի այդ, ինչպես հաղորդում է Associated Press-ը, հավանության է արժանացել դեպի Իսրայել գազի մատակարարումը դադարեցնլու որոշումը:
Եգիպտացի օրենսդիրների դեմարշի համար պատճառ է հանդիսացել «Գազայի հատվածում պաղեստինցիների դեմ ագրեսիան»: Նշենք, սակայն, որ այս պահին դիվանագիտական հարաբերությունների ոլորտում որոշումներ է կայացնում Զինված ուժերի բարձրագույն խորհուրդը, և ընդունված նախաձեռնություններն օրենքի ուժ չեն ունենում: Արդեն 2012 թ. ամռանը, երբ ռազմական ղեկավարությունը ստիպված կլինի ցած դնել լիազորությունները, հետազոտողները կանխատեսում են երկու երկրների հարաբերությունների կտրուկ վատթարացում:
Ժողովրդական ժողովում տեղի ունեցած քվեարկության ժամանակ սրահում հնչել են այնպիսի արտահայտություններ, ինչպիսիք են՝ «Եգիպտոսը երբեք չի լինի Իսրայելի բարեկամը, գործընկերը և դաշնակիցը» և «Իսրայելը Եգիպտոսի թիվ մեկ թշնամին է»: Խորհրդարանականները կարծիք են հայտնել, որ բոլոր միջոցներով անհրաժեշտ է աջակցել պաղեստինցիների դիմադրությանը:
Հիշեցնենք. վերջին մի քանի օրերին տարածաշրջանում դրությունը խիստ լարվել է այն բանից հետո, երբ ուրբաթ՝ մարտի 9-ին, Իսրայելի բաց թողած հրթիռի հետևանքով Գազայի հատվածում մեքենա ոչնչացվեց, որում գտնվում էին իսլամիստական ՀԱՄԱՍ շարժման 2 անդամներ: Իսրայելի իշխանությունների պնդմամբ՝ նրանցից մեկը հարձակում էր նախապատրաստում Իսրայելի վրա: Ի պատասխան՝ պաղեստինյան ուժերն Իսրայելի վրա արձակեցին մոտ 200 հրթիռ, որոնց մեծ մասը վնասազերծվեց Իսրայելի ՀՀՊ-ի կողմից:
Տարածաշրջանում լարված իրադարձության 4 օրերի ընթացքում Գազայի հատվածում զոհվել է 25 մարդ, այդ թվում՝ խաղաղ բնակիչներ: Իսրայելի հարավում վիրավորվել է 5 մարդ:
Այսօր ավելի վաղ հաղորդվում էր, որ Եգիպտոսի հովանու ներքո Իսրայելի և Գազայի միջև կրակը դադարեցնելու համաձայնություն է ձեռք բերվել:
