Գազայի հատվածում գրոհայինները շարունակում են հրթիռային հարվածներ հասցնել իսրայելական տարածքներին` անտեսելով այն, որ այս գիշեր իսրայելական իշխանությունները և Գազայի զինյալները համաձայնության էին եկել հաշտություն կնքելու վերաբերյալ:
Պաղեստինցիները փորձում են սադրանքների դիմել Իսրայելի նկատմամբ. նրանց բլոգներում, ովքեր պաշտպանում են զինյալներին, հայտնվել են 6 տարի առաջ ՃՏ-ի ժամանակ զոհված աղջկա հին լուսանկարներ, որոնք փորձում են հիմա ներկայացնել իբրև իսրայելցիների կողմից կատարված նոր սպանություն: Գիշերվանից սկսած, երբ ուժի մեջ է մտել կրակը դադարեցնելու մասին համաձայնությունը, մինչ առավոտ Իսրայելի վրա Գազայի կողմից արձակվել է 8 հրթիռ և 4 ականանետային արկ:
Կրակահերթեր են արձակվել Էշկոլ, Շաար ա Նեգև և Խոֆ Աշկելոն շրջանների ուղղությամբ: Այս մասին հայտնում է NEWSru Israel-ը: Դրանց հետևանքով տուժածներ չկան: Արկերը ոչ մի շինության վնաս չեն պատճառել:
Իսրայելի պաշտպանության բանակի զինվորները մի քանի պատասխան հարված են հասցրել Գազայի հատվածին: Իսրայելի զինված ուժերը բերված են մարտական առավելագույն պատրաստականության:
Եգիպտոսի հովանու ներքո ձեռք բերված համաձայնությունը նախատեսում է ամբողջությամբ դադարեցնել բոլոր գործողությունները:
Ռազմական գործողությունները իսրայելա-պաղեստինյան սահմանին շարունակվում էին վերջին մի քանի օրերի ընթացքում: Դրանք սկսվեցին այն բանից հետո, երբ ուրբաթ՝ մարտի 9-ին, Իսրայելի բաց թողած հրթիռի հետևանքով Գազայի հատվածում մեքենա ոչնչացվեց, որում գտնվում էին իսլամիստական ՀԱՄԱՍ շարժման 2 անդամներ: Իսրայելի իշխանությունների պնդմամբ՝ նրանցից մեկը հարձակում էր նախապատրաստում Իսրայելի վրա:
