Կենտրոն և Նորք-Մարաշ վարչական շրջանների ընդհանուր իրավասության դատարանում քննվում է ԶՈւ սպա Գագիկ Աղաջանյանի գործը, որը մեղադրվում է քրեական օրենսգրքի միանգամից 7 հոդվածներով նախատեսված հանցանքների մեջ` զորամասն ինքնակամ լքելու (361 հոդ. 3-րդ մաս), պաշտոնական դիրքն օգտագործելով զենք-զինամթերք հափշտակելու ( 238-ի 3 մաս), խոշոր և առանձնապես խոշոր չափերի գույք հափշտակելու նպատակով կատարած ավազակության (175-ի 2-րդ մասի 1, 3, 4 կետեր, 175-ի 3մասի 1 կետ), երկու և ավելի անձանց նկատմամբ, զենքի գործադրմամբ, կյանքի կամ առողջության նկատմամբ վտանգավոր բռնություն գործադրելով ազատությունից ապօրինի զրկելու (133-ի 2-րդ մասի 2, 3, 6 կետեր), ապօրինի կերպով զենք ձեռք բերելու, կրելու (235-ի 1 մաս), օրենքով չնախատեսված զինված միավորումներ ստեղծելու (324-ի 2 մաս) համար: Ընդ որում` նա զինված միավորում է ստեղծել անչափաս եղբոր` Արամի հետ, և նրանց գործողություններից տուժել են Երևանի, Աբովյանի, Արմավիրի 14 քաղաքացիներ:
Գագիկը հանցագործությունների կատարման ժամանակ եղել է ԶՈւ ԳՇ պետ Յուրի Խաչատուրովի որդու` Գրիշա Խաչատուրովի ղեկավարած` Վազգեն Սարգսյանի անվան Արարատի զորամասի դասակի հրամանատար, պայմանագրային զինծառայող: Նա 1 ամսվա ընթացքում 2 անգամ 3 օր և ավելի տևողությամբ առանց հարգելի պատճառների չի ներկայացել ծառայության վայր, պաշտոնեական դիրքն օգտագործելով կատարել է զենքի հափշտակություններ, եղբոր` Արամ Աղաջանյանի հետ խումբ կազմելով, շինություններ ապօրինի մուտք գործելով, զենքի գործադրմամբ կատարել է 3 ավազակություններ, որոնցից 2 դեպքում կատարել է խոշոր չափերով, 1 դեպքում առանձնապես խոշոր չափերով հափշտակություններ, ինչպես նաև զենքի գործադրմամբ երկու և ավելի անձանց նկատմամբ բռնություն գործադրելով ապօրինի զրկել են ազատությունից: Հոդվածների համակցությունից ահա այսպիսի պատկեր է ստացվել, և եթե դրանք դատարանը հաստատված համարի, ապա Գագիկ Աղաջանյանին շատ լուրջ պատժաչափ է սպասվում: Իսկ նրա կրտսեր եղբայրը` Արամը, մեղադրվում է միայն ավազակային հարձակումների մեջ: Նշենք նաև, որ Գագիկի հափշտակածը «ԼՊ 7396» և «ՄՏ 3630» 7.62 մմ տրամաչափի ԱԿ տեսակի ինքնաձիգներ են եղել:
Ի դեպ, «Առաջին լրատվական»-ի տեղեկություններով` Գագիկ Աղաջանյանը մինչ Գրիշա Խաչատուրովի` ֆինանսական սկանդալներով լի զորամասում ծառայելը, ծառայություն է իրականացրել ԼՂՀ-ի հյուսիսարևելյան մեկ այլ զորամասում, որը ևս հայտնի է զինվորների մահվան դեպքերով: Մարդիկ, ովքեր շատ մոտիկից ճանաչել են Գագիկին, նշում են, որ նա ԼՂՀ դիրքերում ծառայելու ժամանակ մահացած զինվորների (սպանված, ինքնասպան եղած) դիակներ տեսնելուց, դուրս բերելուց հոգեկան այնպիսի խանգարումներ է ունեցել, որ որոշ ժամանակ ստիպված է եղել բժիշկների հսկողության տակ մնալ: Քիչ թե շատ ապաքինվելուց հետո կրկին վերադարձել է զինված ուժեր: Թե որքանով է ճիշտ եղել նրան բանակ վերադարձնելը և որքանով է այդ ամենը ազդել հանցագործության կատարման վրա` դժվար է ասել: Համենայնդեպս, ասում են, որ նա այժմ այնքան գիտակից վիճակում է, որ չափազանց շատ է զղջում եղբորը հանցագործության մեջ ներքաշելու համար:
