Եվրամիության անդամ երկրների արտաքին գործերի նախարարները հայտարարել են, որ չնայած Սիրիայում ամեն օր արձանագրվող մեծաքանակ զոհերին` այս պահին ռազմական ներխուժումը մերձավորարևելյան այդ երկիր հնարավոր չէ:
Կոպենհագենում կայացած հանդիպման ժամանակ նախարարները նշել են, որ միջազգային զորքերի ներխուժումը Սիրիա կարող է «լայնածավալ հրդեհի» պատճառ հանդիսանալ:
Գերմանիայի արտաքին գործերի նախարար Գիդո Վեստերվելլեն մասնավորապես ասել է. «Մենք պետք է խուսափենք լայնածավալ հրդեհից, որն իրականում աղետալի հետևանքներ կունենա տարածաշրջանի, մարդկանց և ողջ աշխարհի վրա»:
Նման կարծիք է հայտնել նաև Լյուքսեմբուրգի արտաքին գործերի նախարար Ժան Ասելբորնը, որը համբերության կոչ էր արել. «Մենք, ցավոք, պետք է համակերպվենք մեծաքանակ զոհերի փաստի հետ, ռազմական ներխուժումը ավելի կվատթարացնի իրավիճակը: Այդ ժամանակ կլինեն ոչ թե հազարավոր, այլ տասնյակ հազարավոր զոհեր»,- ասել է նա:
Հիշեցնենք, որ ավելի վաղ ԵՄ անդամ երկրների արտգործնախարարները հայտարարել էին, որ ընդունված պատժամիջոցներն ազդում են գործող ռեժիմի վրա, ինչի վկայությունն է ընդդիմության կողմն անցած քաղաքական գործիչների և զինվորականության մեծ քանակը: