Ամերիկյան Heritage հիմնադրամի և հեղինակավոր The Wall Street Journal պարբերականի անցկացրած ամենամյա հետազոտության արդյունքներով տնտեսական ազատությունների մակարդակով Հայաստանը 2010-ին մի փոքր բարելավել է դիրքերը նախորդ տարվա համեմատ և այժմ արդեն զբաղեցնում է 36-րդ հորիզոնականը` աշխարհի շուրջ 180 երկրների շարքում: Զեկույցում արձանագրված է, որ պաշտոնյաների կողմից կաշառք պահանջելը սովորական բնույթ է կրում, կոռուպցիան շարունակում է մնալ համատարած տնտեսության շատ ճյուղերում, կառավարության հետ սերտ կապեր ունեցող գործարարները մոնոպոլ դիրք են զբաղեցնում բազմաթիվ կենսական նշանակություն ունեցող ապրանքների ներկրման ոլորտում: Ըստ զեկույցի հեղինակների` արդարադատության համակարգը դեռևս հաղթահարում է թերզարգացածության փուլն ու կոռուպցիան, որոնք զգալիորեն դանդաղեցնում են ստանձնած պարտավորությունների կատարումը: Սրանից զատ` նշված է նաև, որ պետական պարտքի մակարդակը աճում է և այժմ արդեն մոտենում է ՀՆԱ-ի 50 տոկոսի մակարդակին: «Առաջին լրատվականը» Հայ ազգային կոնգրեսի անդամ, տնտեսագետ Վահագն Խաչատրյանից հետաքրքրվեց, թե որքանով է արժանահավատ այն տեղեկությունը, որ Հայաստանը զբաղեցնում է 36-րդ հորիզոնականը 180 երկրների շարքում: Վահագն Խաչատրյանը մեր զրույցի ժամանակ նշեց, որ զեկույցի հեղինակները տվյալները վերցրել են պաշտոնական աղբյուրներից (մասնավորապես` Կենտրոնական բանկից ) ու դեսպանատներից, և այն չի համապատասխանում իրականությանը: Նրա համար տարօրինակ է, որ Հայաստանը հայտնվել է 36-րդ տեղում այն դեպքում, երբ գոյություն ունի օլիգարխիկ համակարգ: «Ինչպե՞ս կարող է այդ դեպքում խոսք լինել տնտեսական ազատության մասին»,- հարցնում է Վահագն Խաչատրյանը: