Թուրքական Dünya Bülteni կայքի փոխանցմամբ՝ թուրքական անվտանգության ուժերին հաջողվել է գաղտնազերծել երկրում ահաբեկչական հռչակված ու արգելված «Քրդստանի աշխատավորական» կուսակցության (PKK) արյունալի պլանը, որը պլանավորված էր իրագործել Նովրուզին (Նոր տարի, մարտի 21):
Թուրք ոստիկանության պնդմամբ՝ ամեն տարի Նովրուզին քրդաբնակ Դիարբեքիրում հավաքվում է ավելի քան 100,000 մարդ, իսկ PKK-ն պլանավորել է օգտվել դրանից և կրակ բացել ժողովրդի վրա: Ապա PKK-ն դրանում մեղադրելու էր ոստիկանությանը և առաջացնելու էր ժողովրդական հուզումներ: Այս մասին թուրքական ոստիկանությանը հայտնել է Ղանդիլից (Հյուսիսային Իրաք) Դիարբեքիր գործուղված և ձերբակալված PKK-ի ներկայացուցիչը:
Հիշեցնենք, որ ավելի վաղ թուրքական ԶԼՄ-ները հայտնել էին, թե PKK-ն պլանավորել է մինչև Նովրուզ մի շարք արյունալի գործողություններ իրականացնել Թուրքիայի ողջ տարածքում:
Այդ նպատակով PKK-ն Թուրքիա է գործուղել իր 200 ներկայացուցչի, որոնք նախապես 3 շաբաթ շարունակ նախապատրաստական դասընթաց են անցել Ղանդիլում: Դրա հետ կապված` Թուրքիայի անվտանգության ուժերում հայտարարվել էր «կարմիր տագնապ» և ձերբակալվել էր մի քանի տասնյակ մարդ:
