Կանանց միջազգային օրվա կապակցությամբ ՄԱԿ-ը դիմել է Աֆղանստանի իշխանություններին՝ պահանջելով անհապաղ կյանքի կոչել մոտ երկու տարի առաջ ընդունված օրենքը՝ կանանց նկատմամբ բռնությունը դադարեցնելու վերաբերյալ:
Ինչպես հաղորդում է RIA Novosti-ն, ՄԱԿ-ի՝ Աֆղանստանի հետ համագործակցության մարդու իրավունքի (МООНСА-UNAMA) գրասենյակի կողմից այսօր հրապարակված հաղորդագրության մեջ ասվում է, որ «քանի դեռ աֆղան կանայք և աղջիկներն անօրինականորեն բռնության են ենթարկվում, Աֆղանստանում կանանց իրավունքների ապահովման հարցում առաջընթացը քիչ հավանական է»:
«Աֆղան կանանց իրավունքների երաշխավորումը, ինչպես նաև նրանց մասնակցությունը հասարակական կյանքին, հավասար հնարավորությունների ապահովումը կրթության և զբաղվածության ոլորտներում, պահանջում են ոչ միայն նրանց իրավունքների պաշտպանություն թղթի վրա, այլև կանանց դեմ բռնությունը դադարեցնելու մասին օրենքի ծայրահեղ արագ և լիակատար իրականացում»,- ասվում է կազմակերպության մամուլի հաղորդագրության մեջ:
2011 թ. նոյեմբերին МООНСА-ի մարդու իրավունքների գրասենյակը հրապարակեց 33 էջանոց զեկույց՝ կապված Աֆղանստանում կանանց իրավունքների պաշտպանության մասին օրենքում թույլատրվող բացթողումների հետ:
Ըստ այդ զեկույցի՝ օրենքում հստակ նշվում է, որ այնպիսի գործողություններ, ինչպիսիք են անչափահաս երեխաներին բռնի կնության տալը, ամուսնության նպատակով կանանց առքուվաճառքը, որևէ խնդրի քննարկման ժամանակ նրանց ձայնի իրավունքից զրկելը, ծեծը, բռնաբարությունը (որը հանգեցնում է ինքնասպանության) համարվում են հանցագործություններ: Օրենքը նախատեսում է հստակ պատիժ հանցագործների համար:
«Չնայած այն բանին, որ օրենքն ընդունվել է, МООНСА-ն փաստում է, որ կանանց դեմ բռնությունը շարունակվում է, իսկ պաշտոնատար անձինք դատական մարմիններում այդպես էլ այդ օրենսդրական նորմը գործի չեն դնում կանանց դեմ բռնությունների դեպքերում»,- ասվում էր զեկույցում:
Կանանց միջազգային օրվա կապակցությամբ МООНСА-ն դարձյալ կրկնել է Աֆղանստանի կառավարությանն ուղղված իր խորհուրդները: Բացի այդ, կազմակերպությունը կոչ է արել դոնոր պետություններին ֆինանսական օգնություն ցուցաբերել Աֆղանստանի կանանց իրավունքների պաշտանությամբ զբաղվող կազմակերպություններին:
Քաբուլում ՄԱԿ-ի ներկայացուցիչների այս խիստ հայտարարությունը հնչել է օրերս Աֆղանստանի ուլեմների (աստվածաաբաններ) խորդհրի կողմից արված նոր կարգադրություններից հետո, ըստ որոնց՝ կանանց արգելվում է աշխատավայրում խոսել տղամարդկանց հետ, եթե նրանք արյունակցական կապ չունեն, բացի այդ, նրանք պետք է աշխատեն և սովորեն տղամարդկանցից առանձին գրասենյակներում և լսարաններում և առանց ազգական տղամարդու ուղեկցության դուրս չգան զբոսանքի:
Աֆղանստանի նախագահ Համիդ Կարզայը հրապարայնորեն հավանություն է տվել ուլեմների այս որոշմանը՝ նշելով, որ դա «պաշտպանում է կանանց իրավունքները»:
