Ռուսաստանում ընթացող գործընթացները Հայաստանի համար շատ կարևոր են: Այսօր կայացած մամուլի ասուլիսում իր կարծիքը հայտնեց քաղաքագետ Ստեփան Գրիգորյանը:
«2000 թվականին Ռուսաստանի հասարակության տարբեր շրջանակներում կայունության, աշխատավարձերի ու թոշակների բարձրացման պահանջարկը մեծ էր: Պուտինն այն ժամանակ իշխանության եկավ հենց այդ պահանջները բավարարելու: Այդ ժամանակ քաղաքացիական հասարակությունը Ռուսաստանում թույլ էր, չկայացած, և Պուտինի լեգիտիմության հարց չէր էլ շոշափվում: Նա ուղղակի հեշտորեն հաղթահարում էր ընտրությունները:
Հիմա ռուսաստանցիներն իշխանությունից այլ բան են սպասում` մեծ չափերի հասնող կոռուպցիայի մակարդակի նվազեցում, իշխանությունների լեգիտիմության հարցի հաստատում: Բացի այդ, Ռուսաստանում այս տարիների ընթացքում քաղաքացիական հասարակությունը բավական հասունացել է, ինչն էլ այլ իրավիճակ է ստեղծում այդ երկրում»,- ասաց քաղաքագետը:
Անդրադառնալով Վլադիմիր Պուտինի` երրորդ անգամ նախագահ ընտրվելուց հետո Ռուսաստանում հնարավոր զարգացումներին` Ստեփան Գրիգորյանը նշեց, որ կարող է երկու սցենար զարգանալ` պայքար կոռուպցիայի դեմ կամ սահմանափակումներ մարդու իրավունքների պաշտպանության ոլորտում:
«Ես հակված եմ մտածելու, որ փորձ կարվի արգելել հանրահավաքները, ճնշել ընդդիմությանը: Կուժեղանան հակաամերիկյան քարոզչությունը, Ռուսաստանի ճնշումը հետխորհրդային տարածքում: Պուտինի առաջարկած Եվրասիական միության ձևաչափը կլինի դրա վկայությունը»:
Քաղաքագետի կարծիքով՝ Ռուսաստանի համար ՀՀ խորհրդարանական ընտրություններն այնքան էլ կարևոր չեն, նրանք առանձնակի ուշադրություն են դարձնելու հաջորդ տարի կայանալիք նախագահական ընտրություններին:
«Ռուսաստանը լավ է գիտակցում, որ ով էլ ընտրվի ՀՀ նախագահ, իր հետ շատ լավ է աշխատելու»,- նկատեց Գրիգորյանը:
Ամփոփելով` նա ընդգծեց, որ Վլադիմիր Պուտինը Մեդվեդևից ավելի լավ է պատկերացնում ԼՂ խնդիրը և գիտակցում է, որ այն դժվար ու երկարատև ջանքեր պահանջող հարց է. «Ըստ ամենայնի` ԼՂ հարցում ստատուս քվոն կպահպանվի, քանի որ Պուտինն ավելի ռեալ պատկերացում ունի հակամարտության մասին»: