«Արտֆուդ» Արտաշատի պահածոների գործարանը մինչ օրս չի վճարել Արարատի մարզի մի քանի գյուղերի բնակիչներից դեռ անցած տարի աշնանը մթերված լոլիկի դիմաց, թեև խոստացել էին, որ մինչև մարտի 1-ը կփակեն բոլոր պարտքերը: Մասնավորապես, Ոսկետափի գյուղապետ Սարգիս Աբրահամյանն «Առաջին լրատվական»-ին հայտնեց, որ գործարանը գյուղացիներին 50-60 հազարական դրամ, նույնիսկ 600 հզ. դրամ, 220 հզ. դրամ էլ գյուղապետարանին դեռ պարտք ունի. «Ժամանակացույց են դրել, մանր-մունր փակում են: Ընդհանուր մի քանի միլիոն դրամ կլինի»:
Լուսառատի գյուղապետ Դանիել Հակոբյանը մեզ տեցեկացրեց, որ իրենց համայնքում նույնպես լոլիկի դիմաց պարտքը «Արտֆուդ»-ը դեռ ամբողջությամբ չի փակել, բայց օրերը նշանակված են, գյուղացիները պետք է գնան, ստանան իրենց փողը: «Մարդիկ ունեմ, որ մինչև մարտի 13-ը պետք է գնան, ստանան: Ումը որ նշանակված է եղել, ստացել են: Ընդհանուր մոտ 14 հոգի են, ու մոտ 1 մլն դրամի չափ է գալիս պարտքը»:
«Արտֆուդ» գործարանի գյուղբաժնի վարիչ Դավիթ Ավետիսյանը մեզ հայտնեց, որ փետրվարի 25-ից ամեն օր, բացի կիրակիներից, գյուղացիները ստացել են իրենց հասանելիք գումարը, և առաջիկա 3 օրվա ընթացքում պարտքն ամբողջությամբ կփակվի. «Զուգահեռ պայմանագրերի կնքման պրոցես է գնում, և մարդիկ կան, որ նաև կանխավճար են ստանում»:
Գյուղատնտեսության փոխնախարար Ռոբերտ Մակարյանն «Առաջին լրատվական»-ի հետ զրույցում նշեց, որ վճարումների ուշացումը պայմանավորված է կանխավ ծրագրված ծավալից ավելի շատ կատարված մթերումներով:
«Քանի որ շատ էին մթերել, դրա համար մի քիչ ուշացավ, բայց գումարը կա, գյուղացիները արդեն գնում, ստանում են: Մի փոքր տոկոս է մնում, այս շաբաթվա վերջ կվերջացնեն: Ոչ թե գումարի, այլ տեխնիկական խնդիր է: Կարգադրվել էր գյուղացիների մոտ բերքի ավելցուկ չթողնել»,- ասաց փոխնախարարը՝ հավելելով, որ մյուս ընկերությունների հետ կապված խնդիր չկա, պարտքերը մինչև 2012 թ. հունվարի 1-ը մարել էին:
