«Համաձայն ՀՀ կառավարության 09.09.2010 թ. թիվ 1258-Ն որոշման` Երևան քաղաքի Թումանյան, Նալբանդյան, Ավագ Պետրոսյան փողոցներով և Սայաթ Նովայի պողոտայով պարփակված տարածքում գտնվող գույքերի նկատմամբ ճանաչվել է բացառիկ` գերակա հանրային շահ, և դրանք ենթակա են օտարման համապատասխան փոխհատուցմամբ` օրենքով սահմանված կարգով: Ձեր կողմից տնօրինվող գույքը գտնվում է իրացման գոտում: Խնդրվում է գույքի վերաբերյալ առկա փաստաթղթերով ներկայանալ Երևանի քաղաքապետարանի «Երևանի կառուցապատման ներդրումային ԾԻԳ» ՀՈԱԿ Բուզանդի 1/3 հասցեով». այս հայտարարությունը, որն այսօր արդեն պատռված է, փակցված էր տվյալ տարածքի ավտոտնակներից մեկին: Կառավարությունը 2010 թ. մարտի 18-ի 316Ա որոշմամբ «Ավագ Շին» ընկերությանը հնարավորություն տվեց այդ տարածքում կառուցել 16 հարկանի էլիտար շենք, իր երկհարկանի ավտոկայանատեղիով: Այս պահին տարվում են` «Երեխաների զարգացման կենտրոնի» գետնին հավասարեցման աշխատանքները: Բնակիչներից շատերը իրենց դժգոհությունն են արտահայտում, ոմանք էլ շատ գոհ են, որ այս մանկապարտեզը քանդվում է, քանի որ այն այնքան էլ բարեկարգ վիճակում չէր գտնվում:
Գրիգորը, որը բնակվում է այդ տարածքում շատ մտահոգ է. «Ես կարծում եմ, որ եթե ինչ-որ բան հռչակվում է «հանրային շահ», ուրեմն պետք է հանրային քննարկումներ կատարվեն, որպեսզի մարդիկ իմանան և կարողանան իրենց բողքի ձայնը բարձրացնել, քանի որ այդ բարձրահարկ շինությունը խանգարելու է նրանց թե՛ լույսի իմաստով, թե՛ օդի: Քանդվելու են նաև մանկապարտեզին հարակից ավտոտնակները, քանի որ դրանք խանգարում են»:
Գրիգորը ցավով է նշում, որ ոչ ոք այս քաղաքում չի մտածում կանաչապատ տարածքների պահպանման մասին. «Այս տարածքում շատ գեղեցիկ և հին ծառեր կային, որոնք կտրվելուց հետո հաստատ նորից չեն տնկվելու, և մենք կորցնելու ենք այն կանաչ տարածքը, որ ունեինք»:
Մարիամ Պետրոսյանը, որը իր երեխայի հետ անցնում էր այդ փոշոտ և ցեխոտ տարածքով, ասաց, թե շատ ճիշտ է, որ քանդում են, որովհետև տարածքը ոչ բարեկարգ վիճակում էր. «Թող քանդեն, գոնե մարդիկ նորմալ տներում կապրեն, ու բոլորը կողմ են, ի՜նչ դժգոհություն, շենքը ոչ ոքի չի խանգարելու, ես մակետը տեսել եմ, շենքը մեջտեղում է կառուցվելու և ունենալու է ավտոկայանատեղի, իսկ լուսավորությունը չի փակելու, 16 հարկանի և մի մուտքանի շենքը մյուս շենքերի լուսավորությունը չի փակի, և, ի վերջո, մեքենաները կանգնեցնելու տեղ կունենանք։ Ես իմ անձնական մեքենան չգիտեմ՝ որտեղ կայանեմ, տեղ չկա, իսկ նոր շենք կառուցելու դեպքում այդ հարցը կլուծվի»:
Շատ անհանգստացած են նաև «Մենք ենք այս քաղաքի տերերը» խմբի անդամները, որոնք մի քանի ամիս շարունակ փորձում են բնակիչների ուշադրությունը սևեռել այս խնդրի վրա: Խմբի անդամներից Լենան մեզ հետ զրույցում ասաց, որ եթե տարածքը իսկապես բարեկարգման խնդիր ունի, ապա հարցը չպետք է նման կերպ լուծել. «Ինչ է ստացվում, որ տարածքը տալիս են կառուցապատողին, կառուցապատողն էլ իր բիզնես ծրագիրն է իրականացնում, և, փաստորեն, այս տարածքի բնակիչները զրկվում են իրենց բակային տարածքից, բնականաբար, կրճատվում է այն տարածքը, որը կարող էր կանաչապատ լինել: Մեր կարծիքով, նմանատիպ բակային տարածքները պետք է բարեկարգվեն քաղաքային բյուջեից, որովհետև սրանք հանրային տարածքներ են և չպետք է տրվեն ինչ-որ մասնավոր անձանց կառուցապատում իրականացնելու համար»:
Հիշեցնենք, որ այս տարածքը պատկանում է ԱԺ նախագահ Հովիկ Աբրահամյանին, որը մամուլում հերքել էր իր առնչությունն այդ տարածքի սեփականաշնորհմանը:
