Երևանի Կենտրոն և Նորք-Մարաշ վարչական շրջանների ընդհանուր իրավասության դատարանն այսօր հետաձգեց Ճանապարհային ոստիկանության նախկին պետ Մարգար Օհանյանի և ՃՈ աշխատակիցներ Ստեփան Կարախանյանի, Արա Լևոնյանի և Սամվել Մախմուրյանի կողմից բենզինի յուրացման գործով դատական նիստը:
Դատաքննական փուլն արդեն ավարտված է, դատարանն այսօր պետք է անցներ դատական վիճաբանությունների փուլին, մեղադրող դատախազ Հարություն Հարությունյանը պետք է կարդար մեղադրական ճառը, սակայն ամբաստանյալ Ստեփան Կարախանյանի պաշտպան Լիանա Գրիգորյանի բացակայության պատճառով նիստը հետաձգվեց. այն կշարունակվի մարտի 13-ին, ժամը 11.30-ին:
Պաշտպանը գրավոր ծանուցմամբ դատարանին հայտնել էր, որ հիվանդության պատճառով չի կարող մասնակցել նիստին, և խնդրել էր բացակայությունը համարել հարգելի ու հետաձգել դատական նիստը: Դատավոր Մխիթար Պապոյանը թեև համապատասխան բժշկական փաստաթղթի բացակայության պայմաններում պաշտպանի բացակայությունը հարգելի չհամարեց, այնուհանդերձ որոշեց, որ առանց ամբաստանյալի պաշտպանի նիստը շարունակել հնարավոր չէ: