Ապրիլի 25-ին սպասվում է 2011 թվականի բարիդրացիական քաղաքականության շրջանակներում Ադրբեջանի առաջընթացի մասին զեկույցի հրապարակում:
Ինչպես տեղեկացնում է АПА-ն, այս մասին այսօրվա տեսակոնֆերանսում հայտարարել է Եվրամիության ընդլայնման և եվրոպական հարևանության քաղաքականության հանձնակատար Շտեֆան Ֆյուլեն:
Ֆյուլեն, պատասխանելով այն հարցին, թե ինչպես է ինքը գնահատում բարիդրացիական քաղաքականության շրջանակներում Ադրբեջանի առաջընթացը, ասել է հետևյալը. «Այդ կարգի զեկույց առաջին անգամ կպատրաստվի նոր սկզբունքների և չափանիշների հիման վրա: Ադրբեջանի մասին խոսելիս ես դա միանշանակ տեսնում եմ: Մի կողմից՝ Ադրբեջանում նկատվում է մեծ տնտեսական առաջընթաց: Նա էներգետիկայի ոլորտում Եվրամիության ռազմավարական գործընկերն է, սակայն ԵՄ-ին Ադրբեջանում առկա մի քանի անհանգստացնող հանգամանք կա` մարդու իրավունքների և հիմնարար ազատության հետ կապված:
Շ. Ֆյուլեն նշել է, որ իրենց նաև անհանգստացնում է Ադրբեջանի քաղբանտարկյալների հարցը. «ԵՄ–ն հետաքրքրված է Ադրբեջանի հետ համագործակցությամբ` հիմնված համամարդկային արժեքների վրա: Սակայն դեռ կան որոշ պահեր: Դրանք վերացնելու համար մենք պատրաստ ենք լրացուցիչ քայլերի»:
Հանձնակատարը նաև ասել է, որ խնդիրները վերացնելու համար անհրաժեշտ է առավել ուժեղացնել համագործակցությունը քաղաքացիական հասարակության հետ. «Խոսելով Ադրբեջանի հետ համագործակցության մասին՝ մենք այդ երկիրը չենք դիտարկում որպես միայն էներգետիկ կենտրոն, մենք միաժամանակ պատրաստ ենք աջակցել կրթության, քաղաքային ենթակառուցվածքների զարգացմանը: Ադրբեջանի հետ կապված՝ մենք հաշվի ենք առնում նաև այդ տարածաշրջանի առանձնահատկությունները, որոնցից մեկը կապված է ղարաբաղյան հակամարտության, մյուսը` հարևան երկրների հետ»:
