ԱՄՆ պետքարտուղարի օգնական Ֆիլիպ Գորդոնը հայտարարել է, որ Ադրբեջանի հետ հարաբերություններում Ամերիկայի համար «չկա ավելի կարևոր հարց, քան նվիրումը Ղարաբաղյան հակամարտության խաղաղ և արդար կարգավորմանը»:
«Մեդիամաքս» գործակալությունը տեղեկացնում է, որ այդ մասին ամերիկացի դիվանագետը ասել է Վաշինգտոնում կայացած ամերիկա-ադրբեջանական դիվանագիտական հարաբերությունների հաստատման 20-ամյակին նվիրված միջոցառման ժամանակ:
«Խաղաղությանն ուղղված վերջնական քայլերը հաճախ ամենադժվարն են լինում, սակայն մենք հավատում ենք, որ խաղաղությունը հնարավոր և հարկավոր է: Կողմերի նվիրումը և քաղաքական կամքը մեզ թույլ կտան շարժվել դեպի առավել անվտանգ և բարգավաճ ապագա»,- նշել է ԱՄՆ պետքարտուղարի օգնականը:
«Մենք վստահ ենք, որ միայն բանակցությունների միջոցով կարգավորումը կարող է հանգեցնել երկարաժամկետ խաղաղության ու կայունության և տարածաշրջանային զարգացման ու համագործակցության համար նոր հնարավորություններ բացել: Պետքարտուղար Քլինթոնը չափազանց ուշադիր է հետևում գործընթացին` դրան ժամանակ ու ուշադրություն հատկացնելով», – ընդգծել է Ֆիլիպ Գորդոնը:
