Բեթմենը գլխավորում է բոլոր ժամանակների լավագույն կոմիքսների թոփ տասնյակը

Comic Heroes ամսագրի քվեարկության արդյունքում բոլոր ժամանակների կոմիքսների մեծագույն հերոս է ճանաչվել Բեթմենը` առաջ անցնելով Սարդ Մարդուց և Սուպերմենից: Այս մասին գրում է բրիտանական The Guardian պարբերականը:

Սա առաջին վարկանշային ցուցակը չէ. 2008 թ. Empire ամսագիրը Բրյուս Վեյնի ալտեր էգոյին հատկացրել էր կոմիքսների 50 մեծագույն կոմիքսների շարքում երկրորդ հորիզոնականը Սուպերմենից հետո, իսկ Երկաթյա մարդը 2011 թ. մայիսին գլխավորել էր բոլոր ժամանակների 100 լավագույն կոմիքսների վարկանշային աղյուսակը՝ Imagine Games Network կայքի վարկածով:

Comic Heroes-ի խմբագիր Ջեզ Բիքհեմը հայտարարել է, որ զարմացած չէ քվեարկության արդյունքից, քանի որ 1939 թ. ստեղծված այդ կերպարն առաջին «հետաքրքիր հերոսն» էր:

Բիքհեմի խոսքվ` Բեթմենը չունի վերերկրային կարողություններ, նա իրավիճակից ելքը գտնում է իր խելքի, կարողությունների շնորհիվ:

Հետաքրքիր է, որ վարկանշային աղյուսակում ինչ-որ կերպ հայտնվել է եվրոպական գրաֆիկական վեպերի ընդամենը մեկ կերպար, որը բնավ նման չէ մռայլ հերոսներին` Տինտինը: Նա անգամ գրավել է 6-րդ հորիզոնականը: Հնարավոր է` նրան օգնել է այդտեղ հայտնվել Սթիվեն Սփիլբերգը:

Բեթմենին նվիրված հերթական ֆիլմը` «Մութ ասպետը. վերածնված լեգենդներ»-ը՝ Քրիստոֆեր Նոլանի ռեժիսորությամբ, վարձույթի դուրս կգա 2012 թ. հուլիսի 20-ին:

Ըստ Comic Heroes-ի վարկածի` բոլոր ժամանակների կոմիքսների թոփ տասնյակն ունի հետևյալ տեսքը.

1. Բեթմեն (Batman)
2. Սարդ մարդ (Spider-Man)
3. Սուպերմեն (Superman)
4. Ռոսոմախա (Wolverine)
5. Դրեդ դատավորը (Judge Dredd)
6. Տինտին (Tintin)
7. Ամերիկա կապիտանը (Captain America)
8. Հրաշք կինը (Wonder Woman)
9. Ուրվականը (The Spirit)
10. Էակը (The Thing)