Թուրքական Haber Türk թերթի փոխանցմամբ՝ Թուրքիայի արտգործնախարար Ահմեդ Դավութօղլուն Թունիսում տեղի ունեցած «Սիրիայի բարեկամներ» խմբի կոնֆերանսից հետո լրագրողների հետ զրույցում հայտարարել է, որ Սիրիան Մերձավոր Արևելքի խաղաղության ամենակարևոր երկիրն է.
«Թուրքիան ակտիվ դեր է խաղացել թունիսյան կոնֆերանսի կազմակերպման հարցում և տվյալ հարցում բանակցություններ է վարում Ռուսաստանի ու Չինաստանի հետ: Ոմանք աչք են փակում Սիրիայում տեղի ունեցող իրադարձությունների վրա: Սակայն նրանք թող չկարծեն, որ մենք նույնպես կվարվենք նման կերպ:
Մենք չենք ցանկանում, որ Սիրիայում սկսվի քաղաքացիական պատերազմ: Մենք ցանկանում ենք, որ այդ խնդիրը լուծվի առանց պատերազմի ու արյունահեղության: Սիրիան Իսրայելի, Իրաքի և Լիբանանի հարևանն է, ինչը նշանակում է, որ Մերձավոր Արևելքի խաղաղության ու կայունության տեսանկյունից Սիրիան ամենակարևոր երկիրն է»:
Դավութօղլուն հավելել է, որ մարտին Ստամբուլում տեղի է ունենալու հանդիպում Մերձավոր Արևելքի, այդ թվում՝ նաև Սիրիայի քրիստոնյա համայնքների ներկայացուցիչների հետ:
