Արդեն մի քանի ժամ է, ինչ խուճապ է սկսվել Facebook սոցիալական կայքի շուրջ: Ամեն ինչ սկսվել է այն բանից, որ Weekly World News պարբերականը Ցուկերբերգի հայտարարությունից հետո եզրակացրել էր, թե այդ սոցիալական ցանցը կփակվի: Իսկ Ցուկերբերգը շաբաթօրյա ասուլիսի ժամանակա ասել էր. «Facebook-ը դուրս է եկել վերահսկողությունից, իսկ նրա կառավարման հետ կապված ստրեսը տակնուվրա է արել իմ կյանքը»:
Այս հայտարարությունից հետո Weekly World News-ի՝ չգիտես որտեղից վերցված եզրակացությունը պատճառ է դարձել, որ վիրտուալ աշխարհը պայթի` Facebook-ը փակվում է:
Նախ, չենք կարծում, որ 56 մլրդ դոլարի կապիտալիզացիա ունեցող ընկերությունը կարելի է մեկ օրում վերցնել ու փակել: Բացի այդ, կառավարման հետ կապված խնդիրները սովորական են ամերիկյան և համաշխարհային խոշոր ընկերություններում, և դրանք հեշտությամբ լուծվում են մենեջմենթի փոփոխության շնորհիվ:
Ամենաքիչը, որ կարող է անել ամենահաջողակ երիտասարդ գործարարներից մեկը, իր ընկերությունը վաճառելն է:
Այնպես որ, մեր ընթերցողներին կոչ ենք անում սադրանքների չենթարկվել: Մանավանդ որ Facebook սոցիալական ցանցում նույն ընկերության էջում մի քանի ժամ առաջ հեգնական մի կարգավիճակ է դրվել. «Մենք տեղեկություն չունենք, որ փակվում ենք, այնպես որ, շարունակում ենք աշխատել՝ ինչպես միշտ: Մենք ոչ մի տեղ էլ չենք գնում, դեռ նոր ենք սկսել»:
