Rolling Stone-ի փոխանցմամբ՝ Brit Awards երաժշտական մրցանակաբաշխության կազմակերպիչները ներողություն են խնդրել երգչուհի Ադելից, ում շնորհակալական խոսքր մրցանակաբաշխության ժամանակ ընդհատվել է հանուն Blur խմբի ելույթի։
Brit Awards մրցանակաբաշխության ժամանակ, որը տեղի էր ունեցել 2012թ. փետրվարի 21-ին՝ Լոնդոնում, երգչուհի Ադելն ամենահեղինակավոր անվանակարգում ստացել էր «Տարվա ալբոմ» մրցանակը` իր «21» անունը կրող ալբոմի համար:
Հանդիսատեսի ծափողջույնների ներքո երգչուհին բարձրացել է բեմ, սակայն նրա շնորհակալական խոսքը ընդհատել է մրցանակաբաշխության հանդիսավարը:
Վերջինս այդ քայլին է դիմել, քանի որ շոուն հեռարձակվում էր ուղիղ եթերով և
գերազանցել էր իրեն հատկացված ժամանակը, ինչի պատճառով վտանգված էր հեռուստադիտողների՝ Blur խմբի եզրափակիչ ելույթի դիտումը:
Ադելն, ում ստիպողաբար խնդրել էին հեռանալ բեմից, ի պատասխան՝ լսարանին ցույց է տվել միջնամատը: Երգչուհու և հանդիսավարի վարքը աղմուկ էր բարձրացրել դահլիճում:
Ավելի ուշ Ադելը պարզաբանել է, որ իր այդ ժեստն ուղղված է եղել ոչ թե իր երկրպագուներին, այլ արարողության կազմակերպիչներին:
