Հայաստանում արդեն 1,5 տարի է գործում է «Որոնում» ծառայությունը, որը սակայն Հայաստանի բնակիչներին այնքան էլ պետք չի գալիս: Իր ամբողջ գործունեության ընթացքում «Գլոսա» կազմակերպության այս ծառայությունն ընդամենը 6 հայաստանցու հայտ է ունեցել, մինչդեռ արտասահմանից ու հատկապես Ռուսաստանից ծառայությունն արդեն ստացել է ավելի քան 300 հայտ: Հայտերի 85 տոկոսը ծառայությունն արդեն իրականացրել է և հաջողությամբ կապ հաստատել փնտրվող անձանց հետ: «Գլոսա» կազմակերպության տնօրեն Աշոտ Համբարձումյանը, ով եղել է նաև ռուսական «Սպասիր ինձ» նախագծի Հայաստանի ինքնակամ ներկայացուցիչը, կարծում է, որ Հայաստանում իրենք լավ գովազդային արշավի կարիք ունեն, ինչը, սակայն, մեծ ֆինանսների հետ է կապված: «Մենք պատրաստվում ենք նաև հեռուստատեսությամբ հաղորդում հեռարձակել, որն ամենևին չի լինելու ռուսականի կրկնօրինակը»,- «Առաջին լրատվականի» հետ զրույցում նշեց «Գլոսա»-ի տնօրենը: Նշենք, որ որոնման հայտն արժե 3000 դրամ, իսկ դրանից հետո որևէ այլ գումար չի գանձվում: Եվ միայն այն դեպքում, երբ ծառայությանը որոշակի ժամանակահատվածի ընթացքում չի հաջողվում գտնել փնտրվողին, ծառայությունը կարող է միջնորդ դառնալ փնտրողի և արտասահմանյան դետեկտիվների միջև, որոնք արդեն աշխատում են ժամավճարով: Օրինակ` ֆրանսիացի դետեկտիվն իր երկրում որոնումն իրականացնելու համար 1 ժամի համար պահանջում է 400-500 դոլար, ռուս դետեկտիվն իր երկրում` 2500 ռուբլի և այլն:
