Հոնդուրասի բանտում բռնկված հրդեհի պատճառով զոհված մի քանի հարյուր բանտարկյալների ազգականները ներխուժել են դիահերձարան՝ պահանջելով իրենց հանձնել մահացածների մարմնի մնացորդները:
Ինչպես հաղորդում է BBC-ն, մարդկանց մի մեծ խումբ,- հիմնականում կանայք,- ներխուժել են Հոնդուրասի մայրաքաղաքի դիահերձարան և սկսել բացել սառցարանները՝ իրենց հարազատների մարմինները գտնելու համար: Նրանց դուրս է հանել ոստիկանությունը:
Այդուհանդերձ, նրանք շարունակում են հերթապահել դիահերձարանի մոտ՝ սպասելով, թե երբ են իրենց հանձնելու հարազատների մարմինների մնացորդները:
Վերջին տվյալներով, հրդեհի հետևանքով զոհվածների թիվը հասնում է 360-ի, ոմանց ինքնությունը հնարավոր է եղել պարզել միայն ԴՆԹ փորձաքննության միջոցով:
«Մենք բոլոր ընտանիքներին երաշխավորում ենք, որ մարմինների ճանաչումը կշարունակվի մինչև վերջ»,- հայտնել է դատախազության մամլո քարտուղարը:
Հիշեցնենք, ավելի վաղ հաղորդվում էր, որ հրդեհի զոհերի հարազատները մահացածների մարմինները գտնելու համար գրոհել են բանտը, սակայն ոստիկանությունը ցրել է նրանց արցունքաբեր գազի օգնությամբ: