«Տեղյակ եմ Մաշտոցի պուրակում տեղի ունեցող դեպքերի մասին, սակայն կարծում եմ, որ այդ տարածքը բոլորովին էլ այգու տեսք չուներ, այժմ այս բարեկարգումները գուցե ավելի դրական արդյունք կտան»,- «Առաջին լրատվական»-ի հետ զրույցում նշեց Վ. Բրյուսովի անվան լեզվաբանական համալսարանի ՈւԽ նախագահ Հասմիկ Ափյանը, ապա ավելացրեց. «Չեմ կարծում, որ այդ փոքր տարածքը էական նշանակություն կարող է ունենալ թթվածնի արտադրության համար, կան շատ այլ տարածքներ, որտեղ ավելի շատ է պետք իրականացնել կանաչապատման աշխատանքներ»։
Իսկ թե ինչու ուսանողները չեն մասնակցում՝ ՈւԽ նախագահը նախ պատճառաբանեց նրանով, որ այս տարի լրանում է իրենց ՈւԽ-ի 15-ամյակը։ Դրա հետ կապված իրականացնում են մեծածավալ միջոցառումներ և աշխատում են հագեցած գրաֆիկով։ Ուստի չեն մասնակցում զուտ զբաղվածության պատճառով։
Ապա ներկայացրեց մեկ այլ պատճառաբանություն. «Չեմ կարծում, որ եթե զբաղված չլինեինք պետք է գնայինք մասնակցելու։ Քանի որ ՈւԽ-ի ֆունկցիան հիմնականում ուսանողների իրավունքները պաշտպանելը և նրանց շահերը ներկայացնելն է։ Իսկ այդ տարածքը չեմ կարծում, որ լեզվաբանական համալսարանի համար մտահոգիչ խնդիր է»։
Վերջում էլ ավելացրեց, որ իրենք կողմ են, որ կանաչապատ տարածքները շատ լինեն քաղաքում, սակայն իրավասու չեն միջամտելու նրանց գործունեությանը, քանի որ դրա պատասխանատվությունը այլ կառույցների վրա է դրված։
