Ինչպես հայտնում է Deadline.com կայքը` հղում անելով Կլեոպատրա թագուհու մասին 3D ֆիլմի նախագծի հեղինակ Սկոտ Ռուդինին մոտ կանգնած աղբյուրներին, ֆիլմի ռեժիսորը, ամենայն հավանականությամբ, կլինի հատուկ գործակալ Ջեյսոն Բորնի մասին ֆիլմի հեղինակ Փոլ Գրինգրասը:
Եռաչափ «Կլեոպատրան», որի դերը կկատարի Անջելինա Ջոլին, Sony Pictures-ը նախատեսում է թողարկել 2013 թ.: Այն հիմնվելու է ամերիկուհի լրագրող Սթեյսի Շիֆի գրքի վրա, որը ստացել է Պուլիտցերյան մրցանակ: Ավելի վաղ նա ներկայացրել է Վերա Նաբոկովայի և Անտուան դե Սենտ-Էքզյուպերիի կյանքը:
«Սա Կլեոպատրային ուղղված բացառապես նոր, չափահաս և բարդ հայացք է: Նա այլևս սեքսուալության մարմնացում չէ, այլ` քաղաքագետի, ստրատեգի, մարտիկի: Ջոզեֆ Մանկևիչի ֆիլմում Էլիզաբեթ Թեյլորը մարմնավորել է գայթակղող Կլեոպատրային, իսկ թագուհու մասին բոլոր աշխատություններն ու ստեղծագործությունները գրվել են տղամարդկանց կողմից: Հիմա առաջին անգամ նրա մասին պատմում է կինը: Եվ սա իսկապես գլուխգործոց է, որին դիմանալն անհնար է»,- բացատրում է Ռուդինը:
2010 թ. Ռուդինը երկու անգամ առաջադրվել է ամերիկացի պրոդյուսերների գիլդիայի մրցանակին Դեյվիդ Ֆինչերի «Սոցիալական ցանց» և Քոեն եղբայրների «Երկաթե աքցան» ֆիլմերի համար:
Սկզբանական շրջանում «Կլեոպատրան» պետք է նկարահաներ Ջեյմս Քեմերոնը, սակայն նա ցանկացել է կենտրոնանալ «Ավատարի» շարունակությունը նկարահանելու վրա: Այնուամենայնիվ, սցենարն արդեն պատրաստ է, և Sony Pictures ստուդիան ծրագրում է սկսել նկարահանումներն արդեն 2011 թ.: