Հ.Հովհաննիսյան. Պետք է հաղթահարել պատային վիճակը

Հայաստանի քաղաքագետների միության նախագահ Հմայակ Հովհաննիսյանը ԱՄՆ Կոնգրեսի 112-րդ նստաշրջանում Լեռնային Ղարաբաղի հիմնահարցի քննարկումը համարում է շատ կարևոր նորություն: Այն փաստը, որ, ԼՂ հիմնահարցից զատ, քննարկվելու են նաև Ադրբեջանի էներգետիկ ոլորտի զարգացման հարցը, Հայաստանի տնտեսական զարգացման հարցը և Վրաստանի վերականգնումը 2008 թ. Ռուսաստանի պատերազմից հետո, Հմայակ Հովհաննիսյանը գնահատում է որպես ԱՄՆ ազդեցության ընդլայնում Հարավային Կովկասում: «Առաջին լրատվական»-ի հետ զրույցում նա կարծիք հայտնեց, որ ակնկալվում են տարածաշրջանային լուրջ զարգացումներ: Հմայակ Հովհաննիսյանի կարծիքով` ՀՀ իշխանությունները, մեղմ ասած, պատրաստ չեն արձագանքելու ԱՄՆ արտաքին քաղաքականության նոր շեշտադրումներին: Ըստ Հմայակ Հովհաննիսյանի` ԱՄՆ-ն ձգտում է փոխել տարածաշրջանում ձևավորված ստատուս-քվոն և բացել տարածաշրջանի` արևմտյան աշխարհին ինտեգրվելու ուղիները: Քաղաքագետը կարծում է, որ ԱՄՆ-ն նոր քաղաքականություն է իրականացնելու տարածաշրջանում, սակայն թե ինչպիսին կլինի այն` դժվարացավ կանխագուշակել: «Խոսքը պատային իրավիճակը հաղթահարելու մասին է»,- ասաց նա: Նա հիշեցրեց, որ տարածաշրջանի երկրներն ունեն հակադիր պատկերացումներ տարածաշրջանի ապագայի մասին և չեն կարողանում համադրել այդ պատկերացումներն ու ձևավորել մեկ ընդհանրական մոտեցում: Հմայակ Հովհաննիսյանն ասաց, որ տարածաշրջանի երկրները նաև տարբեր պատկերացումներ ունեն իրենց ազգային անվտանգությունն ապահովելու մասին և նախընտրել են այդ անվտանգությունն ապահովելու տարբեր մեխանիզմներ: Իսկ դրա հետևանքով տարածաշրջանում հնարավոր է՝ առաջանա բաժանարար գծերի ձևավորման պերմանենտ վտանգ, որին էլ արձագանքելու է ԱՄՆ քաղաքականությունը: