Հայաստանում իշխող ապազգային վարչախումբը «Արտակարգ դրության իրավական ռեժիմի մասին» ՀՀ օրինագծով նպատակ է հետապնդում ամրապնդել երկրում հաստատված միահեծան, բռնապետական համակարգը: Այսօր կայացած մամուլի ասուլիսի ժամանակ այս մասին ասաց «Սարդարապատ» նախաձեռնող խմբի անդամ Գարեգին Չուգասզյանը:
Նրա խոսքով՝ օրինագծի նպատակը հավաքները բանակի ուժով ճնշելն է, բանակը ժողովրդից օտարելը: «Բայց իրենց այս քայլով իշխանությունները հարուցում են հենց բանակի առողջ հատվածի` արժանապատիվ սպայակույտի դժգոհությունը: Սա ակնհայտորեն հակասահմանադրական օրինագիծ է, որը, սակայն, ԱԺ-ում առաջին ընթերցմամբ ընդունվեց 62 կողմ, 7 ձեռնպահ և 0 դեմ ձայներով: Իշխանություններն այս օրինագծով փորձ են անում ուժային լծակի` բանակի միջոցով վերջնականապես իրենց հպատակեցնել ժողովրդին»,- ասաց Չուգասզյանը:
Ասուլիսի մյուս բանախոս Ժիրայր Սեֆիլյանն իր հերթին նկատեց, որ հայկական բանակը արցախյան պատերազմի ծնունդն է: «Մեր բանակը, բառիս բուն իմաստով, ժողովրդի ծոցից ծնված հաստատություն է: Այս օրենքն ընդունելով`վարչախումբն ուզում է բանակն օտարել ժողովրդից, և ես հույս չունեմ, որ իշխանությունները խոհեմություն կցուցաբերեն և կհրաժարվեն այս օրինագծից:
Միաժամանակ վստահ եմ, որ բանակի մի զգալի հատվածը դեմ է այս օրինագծին և չի վստահում վարչախմբին: Կարծում եմ` բանակն այսօրվանից պետք է հասկացնի իր գերադասին, որ պատրաստ չէ խախտելու Սահմանադրությունն ու իր արժանապատվությունը, որ օրինագիծը մնալու է թղթի վրա, որ բանակը երբեք ձեռք չի բարձրացնելու սեփական ժողովրդի վրա: Վերջապես, զավակը ծնողի վրա ձեռք չի բարձրացնի:
Այս վարչախմբին երբեք չի հաջողվի բանակը ժողովրդի դեմ հանել: Այստեղ անհեթեթություն կա. ինչո՞ւ են առհասարակ ուզում նման օրենք ընդունել: Եթե ուզում ենք գոյատևել այս տարածաշրջանում, ապա պարտավոր ենք պահպանել բանակ-ժողովուրդ միաձույլ կառուցվածքը»,- նշեց «Սարդարապատ» նախաձեռնող խմբի անդամը:
Անդրադառնալով ԱԺ առաջիկա ընտրություններին` Ժիրայր Սեֆիլյանը նկատեց, որ պետք է արհամարհել այս իշխանությունների նախաձեռնած, «բռնատիրոջ կողմից վերահսկվող» ցանկացած խաղ և հրաժարվել այդ խաղին մասնակցելուց:
«Միաժամանակ, մեր քայլը` չմասնակցել ընտրություններին, բոյկոտի դասական ձև չէ: Մեր խնդիրը մեր ժողովրդին ու երկիրը այս վիճակից դուրս բերելն է: Դրա համար էլ պարտավոր ենք նոր դաշտ ստեղծել և զարգանալ հենց այդ դաշտում»,- ասաց նա:
