ՀՀ կառավարությունն այսօրվա նիստում որոշել է քրեական ոստիկանության միջազգային կազմակերպության (Ինտերպոլի) ճամփորդական փաստաթուղթը` էլեկտրոնային անձնագիրը, ճանաչել որպես ՀՀ պետական սահմանը հատելու իրավունք վերապահող փաստաթուղթ`այն ունեցող անձանց ազատելով ՀՀ մուտքի վիզա ձեռք բերելու պահանջից։
Փոփոխություններ և լրացում կատարելով իր նախկին որոշումներից երեքում և ուժը կորցրած ճանաչելով ևս մեկը` գործադիրը պարզեցրել է մեծ պահանջարկ ունեցող հաշվառման համարանիշների հատկացման գործընթացը, քաղաքացիներին հնարավորություն ընձեռել ցանկացած պահի` առանց աճուրդի անցկացման օրվան սպասելու, ձեռք բերել նման համարանիշներ, որոնք դեռևս չեն տրամադրվել այլ անձանց։
Կառավարության որոշմամբ բաշխվել են 2012 թ. ազգային փոքրամասնություններին պետական աջակցության նպատակով նախատեսված հատկացումները. 10 մլն դրամ հատկացվել է 11 ՀԿ-ի:
