Հյուսիսային Կորեայի առևտրի նախարար Կիմ Բոն Չերը և ևս 4 բարձրաստիկան պաշտոնյաներ զոհվել են երկրի ղեկավարության կողմից առանձին կղզիներից մեկին նվերներ տանող ուղղաթիռի կործանման պատճառով: Հարավկորեական մամուլը պնդում է, որ դեպքը տեղի է ունեցել դեռ փետրվարի 14-ին, սակայն զոհերին մինչ օրս չեն հուղարկավորում, քանի որ երկրում անցկացվում են մահացած առաջնորդ Կիմ Չեն Իրի ծննդյան տոնակատարությունները:
Ինչպես հաղորդում է ITAR-TASS-ը, հարավկորեական լրատվամիջոցներին այս մասին պատմել է Հյուսիսային Կորեայի անանուն աղբյուրը: Նշվում է, որ ավիավթարը տեղի է ունեցել Սունդոն կղզում՝ Չինաստանի սահմանից ոչ հեռու: Նվերների հանձնման արարողությունը նախատեսվում էր հեռարձակել երկրի պետական հեռուստաալիքով:
Հաղորդվում է, որ ուղղաթիռի ընկնելուց հետո անձնակազմին և լրագրողներին հաջողվել է դուրս գալ, սակայն շուտով այն պայթել է, և 5 պաշտոնյաները զոհվել են:
Այնուամենայնիվ, հյուսիսկորեացիները չեն շտապում հուղարկավորել զոհված պաշտոնյաներին, քանի որ երկրում նշվում է մահացած առաջնորդ Կիմ Չեն Իրի 70-ամյակը: Պաշտոնյաները հողին կհանձնվեն տոնակատարությունների ավարտից հետո:
Կիմ Չեն Իրը ծնվել է 1942թ. փետրվարի 16-ին: Պաշտոնապես այդ օրը Հյուսիսային Կորեայում նշում են որպես «Փայլող աստղի օր»:
