130 մլրդ եվրոյի չափով Հունաստանին ֆինանսական օգնության երկրորդ փաթեթը եվրոգոտու ֆինանսների նախարարի կողմից կհաստատվի 2012 թ. փետրվարի 6-ին: Այս մասին հաղորդում է Reuters գործակալությունը՝ վկայակոչելով Եվրահանձնաժողովի աղբյուրը:
Մասնավորապես, ակնկալվում է, որ նշված ժամանակ կհայտարարվի PSI ծրագրի (Հունաստանի պարտքի կրճատման գործում մասնավոր սեկտորի մասնակցության ծրագիր) յուրացման հարցի շուրջ ձեռք բերված փոխհամաձայնության մասին. այն է՝ բանկերի կողմից պարտքի մի մասի ներում, ինչպես նաև դուրսգրման ենթակա պետական արժեթղթերի փոխարինում նորերով:
Հունաստանում արդեն 5-րդ տարին է՝ շարունակվում է տնտեսական ռեցեսիան: Արժույթի միջազգային հիմնադրամի տվյալներով՝ երկրի տնտեսությունը 2011 թ. կրճատվել է 6%-ով, իսկ 2012 թ. ՀՆԱ-ն կնվազի մինչև 3%: Չնայած երկրի բնակիչների համար ցավոտ՝ պետծախսերի կրճատմանը, Հունաստանի բյուջետային դեֆիցիտը շարունակում է մնալ շատ բարձր. ըստ ԱՄՀ տվյալների՝ 2011 թ. այն կազմել է ՀՆԱ 9%-ը: