Ռուսական Regnum լրատվական գործակալության փոխանցմամբ՝ Ադրբեջանի Միլլի մեջլիսի (խորհրդարան) պատգամավոր, իշխող «Ենի Ազերբայջան» կուսակցության (ԵԱԿ) գործադիր քարտուղար Սիյավուշ Նովրուզովն առաջարկել է Ադրբեջանի Հանրապետության անվանումը վերափոխել Հյուսիսային Ադրբեջանի:
Նովրուզովը նշել է. «Այսօր աշխարհում կան այդպիսի օրինակներ, ասենք՝ Հյուսիսային Կորեան և Հարավային Կորեան: Կարելի է թվարկել այդպիսի մի քանի օրինակներ: Իրանի մասը համարվում է Հարավային Ադրբեջան, ինչի համար էլ անհրաժեշտ է Ադրբեջանն անվանափոխել Հյուսիսային Ադրբեջանի: Դա շատ կարևոր է»:
Հիշեցնենք, որ մինչև 20-րդ դարի առաջին քառորդը միջազգային հանրությանն անծանոթ է եղել «ադրբեջանցիներ» բառը, փոխարենը քաջ հայտնի է եղել «կովկասյան թաթարներ» բառը: Մինչև 1920 թվականը Արևելյան Անդրկովկասում ապրող թյուրքական և իրանական ծագում ունեցող քոչվոր և կիսաքոչվոր մահմեդական ցեղախմբերին անվանում էին «կովկասյան թաթարներ» (այլ հավաքական անվանում չլինելու պատճառով):
Նրանց «ադրբեջանցի» անվանումը տալու նպատակը հարմար պահին դեպի Իրանի հյուսիսային շրջանները խորհրդային ինտերվենցիային օրինական տեսք տալն էր` դա հիմնավորելով նրանով, իբրև թե, դրանով միավորվում են մեկ ազգի երկու տարբեր հատվածները:
Այժմ ադրբեջանցիները ներկայացնում են, թե «Ազերբայջան» բառն առաջացել է «ազեր» բառից (азеры – азербайджан բառի կրճատումով) և իբր նշանակում է ազերների երկիր: Սակայն «ազերի» անվանումը շրջանառության մեջ դնելու բուն նպատակը նորաթուխ այդ ազգ-ժողովրդի անվան նմանեցնումն է Իրանի հյուսիսային շրջաններում բնակվող, զուտ իրանական ծագում և հնդեվրոպական հնագույն մշակույթ ունեցող, բայց ներկայումս թյուրքալեզու ազարի ցեղի անվանմանը, ինչի հեռահար նպատակն ակնհայտ է. նույնացնելով ազերի և ազարի ցեղերին՝ հավակնել Իրանի հյուսիսային մերձկասպյան տարածքներին։
