Հունվարի 25-28-ը Իտալիայում ՀՀ դեսպան Ռուբեն Կարապետյանը գտնվում էր Մալթայի Հանրապետությունում` նախագահ Ջորջ Աբելային իր հավատարմագրերը հանձնելու նպատակով:
ՀՀ ԱԳՆ մամլո գրասենյակից «Առաջին լրատվական»-ին տեղեկացնում են, որ այցի առաջին օրը` հունվարի 25-ին, դեսպան Կարապետյանը Մալթայի ԱԳՆ մշտական քարտուղար, դեսպան Ջոն Փոլ Գրեչին է հանձնել իր հավատարմագրերի պատճենը և քննարկել հայ-մալթական երկկողմ համագործակցությանը վերաբերող հարցերի լայն շրջանակ:
Հաջորդ օրը` հունվարի 26-ին, Մալթայի Հանրապետության նախագահի պալատում տեղի է ունեցել հավատարմագրերի հանձնման պաշտոնական արարողությունը, որին հետևել է ՀՀ դեսպան Ռուբեն Կարապետյանի և Մալթայի նախագահ Ջորջ Աբելայի առանձնազրույցը:
Զրույցի ընթացքում Ջորջ Աբելան ողջունել է Մալթայում առաջին անգամ ՀՀ դեսպանի նշանակումը և հույս հայտնել, որ այն լուրջ խթան կհանդիսանա երկու երկրների միջև հարաբերությունների զարգացման գործում:
Իր հերթին, դեսպան Կարապետյանն ընդգծել է Մալթայի հետ Հայաստանի ու հայ ժողովրդի ունեցած բազմադարյա կապերը` վստահեցնելով, որ «կանի առավելագույնը երկու քրիստոնեական հարուստ պատմամշակութային ժառանգություն ունեցող երկրների միջև կապերի խորացման ու ամրապնդման ուղղությամբ»:
Դեսպանը, Մալթայի նախագահին փոխանցելով ՀՀ նախագահի ողջույնները, հրավիրել է այցելել Հայաստան:
Նույն օրը Ռուբեն Կարապետյանը հանդիպել է Մալթայի Ներկայացուցիչների պալատի խոսնակ Մայքլ Ֆրենդոյի հետ, որի ընթացքում քննարկվել են հայ-մալթական խորհրդարանական կապերի խթանման, փոխայցելությունների կազմակերպման հետ առնչվող հարցեր:
Մալթա այցի ընթացքում ՀՀ դեսպանն իր կեցավայրում հանդիպել է նաև Մալթայի փոքրաթիվ հայ համայնքի ներկայացուցիչների հետ:
