Ֆրանսիայում ձերբակալվել է կրծքի իմպլանտներ արտադրող ընկերության տնօրենը: Poly Implant Prothese (PIP)–ն այդ բնագավառում աշխարհի երրորդ խոշոր ընկերությունն է: Մասնագետների պնդմամբ՝ այդ ընկերության իմպլանտները վնասակար են կանանց համար, քանի որ դրանք պատրաստված են արտադրական սիլիկոնից:
Հինգշաբթի օրը ֆրանսիացի ոստիկանները ձերբակալել են PIP կազմակերպության հիմնադիր 72–ամյա Ժան-Կլոդ Մասին: Նրան մեղադրում են ոչ կանխամտածված սպանության և առողջությանը վնաս հասցնելու մեջ:
Ֆրանսիայում մոտ 30 հազար կին կրում է անորակ իմպլանտներ: Նախնական հաշվարկների համաձայն՝ PIP ընկերության հաճախորդների թիվը մոտ 400-500 հազար է: Ընկերությունը դադարել է գոյություն ունենալ 2010 թվականից, երբ պարզվեց, որ այն անորակ սիլիկոններ է արտադրում:
Ստուգումները ցույց են տվել, որ Մասը կիրառել է 10 անգամ ավելի էժան արտադրական սիլիկոն` բժշկականի փոխարեն: Ընկերության ղեկավարը չի հերքել մեղադրանքը, սակայն հայտարարել է, որ որևէ վտանգ չկա: Ֆրանսիայի կառավարությունը նրան չի հավատացել, և հետազոտությունները ցույց են տվել, որ արտադրական սիլիկոնն անդառնալի վնաս է հասցնում կանանց առողջությանը:
Կազմակերպության ծառայություններց օգտվող մոտ 3000 կանայք գանգատներով դիմել են բժշկի: Նրանց մոտ հայտնաբերվել է կաթնային գեղձի քաղցկեղ:
Ձերբակալվել է նաև ընկերության մենեջերը:
